बाग्मती प्रदेशको पहाडी जिल्ला मध्ये दोलखामा पहिलोपटक पशुपन्छी पेलेट दाना उद्योग पुर्ण रुपमा सञ्चालनमा आएको छ ।
संघीय, प्रदेश, स्थानीय सरकारको अनुदान सहयोग र सहकारीको लगानीमा निर्माण भएको उद्योगबाट दैनिक १२ टन दाना उत्पादन हुदै आएको छ ।
दोलखाको तामाकोशी गाउपालिका वडा नम्बर १ भिरकोट स्थित भिमेश्वर बहुउदेश्य सहकारी संस्था लिमिटेडले सञ्चालनमा ल्याएको उद्योग कोरोना संक्रमण फैलन सक्ने भन्दै गरिएको लकडाउन र रकम अभावका कारण २ वर्ष ढिला गरी निर्माण सम्पन्न भएको हो ।
जिल्लामा नै दाना उद्योग सञ्चालनमा आएपछि दाना लिन चरिकोट, रामेछाप पुग्नुपर्ने बाध्यता हटेको र घरको दाना भन्दा यस दानाले पशुहरु पोषिलो हुन थालेको कृषकहरुको भनाई छ ।
करिब ३ करोड लगानीमा निर्माण भएको उद्योगमा संघीय सरकारको ३० लाख, प्रदेश सरकारको साढे ४२ लाख ,स्थानीय सरकारको १५ लाख गरी साढे ८७ लाख सहयोग गरेको हो भने बाकी रकम सहकारी मार्फत व्यवस्थापन गरी सञ्चालन ल्याएको हो ।
प्रदेश सरकार र स्थानीय सहकारीको ५०÷५० प्रतिशत लगानीमा निर्माण गर्ने भनी सम्झौता भएपनि प्रदेश सरकारले थप रकम नपठाउदा समस्या भएको सहकारीका अध्यक्ष श्यामकाजी कटुवालले बताउनुभयो ।

उद्योग सञ्चालनको लागी आवश्यक कच्चा पदार्थ तराईबाट ल्याइने गरेकोमा अब स्थानीय स्तरमा नै उत्पादन गर्नको लागी कृषकहरुलाई सहकारी मार्फत सहुलियत ऋण दिने व्यवस्था मिलाइएको अध्यक्ष कटुवालले बताउनुभयो ।
२१ रोपनी क्षेत्रफलमा सञ्चालित उद्योगबाट हाल गाई, भैसी, बगुर, बाख्राको लागी दाना उत्पादन हुदै आएको छ भने अब छिट्टै लेस कुखुराको लागी दाना उत्पादनको तयारी सहकारीले गरेको छ ।
उत्पादित दाना दोलखा जिल्ला भर विक्रि भइरहेको छ भने उद्योगमा १२ जना युवाहरुले रोजगारी समेत पाएका छन ।