दोलखा
कात्तिक २७

दोलखामा महाकवि देवकोटा जयन्ती मनाइएको छ । भानु विद्यापति साहित्य प्रतिष्ठान, दोलखाको आयोजनामा महाकवि लक्ष्मीप्रसाद देवकोटाको ११३ औं जन्म जयन्ती कार्यक्रम आयोजना गरिएको हो । दोलखा सदरमुकाम चरिकोटमा आयोजित कार्यक्रममा दोलखाका साहित्यकर्मी तथा साहित्यानुरागीहरुको उपस्थितिमा देवकोटाको तस्वीरमा माल्यार्पणसहित नेपाली भाषा तथा साहित्यमा देवकोटाको योगदानको चर्चा गरिएको थियो । कार्यक्रममा साहित्यकार मुरारि मृदु तथा रामप्रसाद सापकोटाले देवकोटाको व्यक्तित्व, कृतित्त्व तथा उहाँका रोचक प्रसङ्गहरुको चर्चा गर्नुभएको थियो । प्रतिष्ठानकी सल्लाहकार तथा कालिन्चोक गाउँपालिकाकी उपाध्यक्ष कालिका पाठकले मुनामदनको लोकलय छन्द गाउँदै रचनासमेत वाचन गर्नुभएको थियो । कवि तथा गजलकार जीत कार्कीको छन्द कविता वाचन गर्नुभएको थियो । कार्यक्रममा साहित्यकार टहल आचार्य, सर्जकहरू अर्जुन अपवाद, अर्जुन गौतम, राजन बस्नेत, सुन्दर खड्का लगायत रचना वाचन गर्नुभएको थियो । प्रतिष्ठानका अध्यक्ष एवं दोलखाका अग्रज साहित्यकार शङ्करलाल श्रेष्ठको अध्यक्षतामा सम्पन्न जन्म जयन्ती तथा रचनावाचन कार्यक्रममा विभिन्न क्षेत्रका व्यक्तित्वहरुको सहभागिता रहेको थियो ।