शिक्षाका लागि राष्ट्रिय अभियान नेपाल दोलखाले लैङ्गिक हिंसा न्युनीकरणमा शिक्षाको भूमिका विषयक वक्तृत्वकला प्रतियोगिताको आयोजना गरेको छ । लैङ्गिक हिंसा विरुद्धको १६ दिने अभियान अन्तरगत भीमेश्वर नगरपालिका माध्यमिक विद्यालय स्तरीय प्रतियोगिताको आयोजना गरेको हो । प्रतियोगितामा पशुपति कन्या माविकी विपना नेपाली प्रथम,कुटीडाँडा माविका विप्लव घिमिरे द्वितीय कालिञ्चोक माविका कृष्ट शिवाकोटी तृतीय,कालिञ्चोक माध्यमिक विद्यालयकै स्वाती मैनालीले सान्त्वना पुरस्कार प्राप्त गर्न सफल हुनु भएको छ ।
शिक्षाका लागि राष्ट्रिय अभियान नेपाल जिल्ला समन्वय समिति दोलखाका सहसंयोजक नवराज न्यौपानेको अध्यक्षतामा सम्पन्न कार्यक्रममा प्रमुख अतिथि एवं भीमेश्वर नगर उपप्रमुख कमला बस्नेतले हिंसा न्युनीकरणको लागि आपैmबाट शुरु गर्नुपर्ने धारणा राख्नु भयो । प्राप्त गरेका सकारात्मक ज्ञानलाई घरपरिवार र समाजमा बाँड्न बालबालिकालाई आग्रह गर्नुभयो । भीमेश्वर नगरपालिकाको सम्वृद्धिका लागि बालबालिकाको भूमिका महत्वपूर्ण हुने भन्दै असल नागरिक बन्न सभ्य र सुसंस्कृत हुन आग्रह गर्नुभयो ।
कार्यक्रममा अधिकारकर्मी एवं महिला मानव अधिकार रक्षकहरुको जिल्ला सञ्जाल दोलखाकी अध्यक्ष तारा तमाङ्ले कार्यक्रममा सहभागी बालबालिकालाई शुभ कामना दिँदै महिला हिंसा अन्त्यका लागि सबै लाग्नु पर्ने धारणा राख्नुभयो । बालबालिकाले सामाजिक समस्या,विकृति र विसंगतिका विरुद्ध कदम चाल्न सके महिला तथा बालिकामाथि हुने सवै प्रकारका हिंसा न्युनीकरणमा सहयोग पुग्ने धारणा राख्नुभयो । सही शिक्षा र चेतनाको विकास भए मात्र बालिका माथि हिंसाका घटनामा कमी आउने बताउनुभयो ।
निर्णायक मण्डलको भूमिका निर्वाह गर्नुभएका भीमेश्वर नगरपालिका शिक्षा प्राविधिक सहायक विष्णु खत्रीले बालबालिकालाई शुभ कामना दिँदै लैङ्गिक हिंसा न्युनीकरण बालबालिकाको क्षमता विकास र बालअधिकार संरक्षणका लागि नगर शिक्षा शाखा सधै साथमा रहेको धारणा राख्नुभयो । कार्यक्रममा ६ विद्यालयका १२ जना विद्यार्थीको सहभागिता रहेको थियो । गौरीशंकर बहुमुखी क्याम्पसकी विद्यार्थी लक्ष्मी श्रेष्ठले कार्यक्रमको सहजीकरण गर्नु भएको थियो ।