कालिञ्चोक गाउँपालिकामा महिलाहरुको क्षमता विकासको लागि ३ दिवसीय उद्घोषण कार्यक्रम सम्पन्न भएको छ । कालिञ्चोक गाउँपालिका वडा नं ७ को सहयोग तथा वडास्तरीय महिला क्षमता तथा सीप विकास समन्वय समितिको आयोजनामा सञ्चालित तालिममा ३० जना महिलाको सहभागिता रहेको थियो । समन्वय समितिकी अध्यक्ष कृतिका शिवाकोटीको अध्यक्षतामा सम्पन्न तालिम कार्यक्रमको समापन समारोहलाई सम्बोधन गर्दै गाउँपालिका उपप्रमुख कालिका पाठकले महिलाको क्षमता विकासको लागि बोल्ने कलाको विकास महत्वपूर्ण रहेको धारणा राख्नु भयो ।  

बोल्न सकेमात्र अधिकार लिन सकिने भन्दै महिलाहरुलाई सही कुरामा बोल्न पछि नपर्न आग्रह गर्नुभयो । कार्यक्रममा वडा नं ७ का वडाध्यक्ष चेत बहादुर खड्काले अवको स्थानीय तहको निर्वाचनका लागि सबै पदमा महिला तयार भएर रहन आग्रह गर्नुभयो । महिलाको क्षमता विकासको लागि वडा सधै तयार भएको प्रतिवद्धता व्यक्त गर्नुभयो । गाउँ कार्यपालिका सदस्य कल्याणी शिवाकोटी,सित्का माध्यमिक विद्यालयका सहायक प्रधानाध्यापक सुजय शिवाकोटी लगायतले शुभ कामना दिनु भएको थियो ।