माघ १३- केन्द्रीय तथ्याङ्क विभागले बुधबार सार्वजनिक गरेको राष्ट्रिय जनगणना २०७८ को प्रारम्भिक नतिजा अनुसार दोलखाको जनसंख्या घटेको पाइएको छ । २०६८को जनसंख्या भन्दा १३ हजार ८ सय ३१ जनाले घटेको विभागले उल्लेख गरेको छ । २०६८ सालमा जिल्लाको कुल जनसंख्या १ लाख ८६ हजार ५ सय ५७ रहेको थियो । १० वर्ष पछि २०७८ को जनगणनाको प्रारम्भिक नजिता अनुसार जिल्लाको १ लाख ७२ हजार ७ सय २६ जना रहेको छ । सेवा सुविधाका लागि ठूला शहरमा बसाइसराई गर्ने क्रम बढेकाले जनसंख्या घटेको तथ्याङ्क अनुमान रहेको छ । जिल्लामा महिलाको संख्या ८८ हजार ५ सय ५४ रहेको छ भने पुरुषको संख्या ८३ हजार १ सय २२ रहेको जिल्ला निर्वाचन अधिकारी सन्तोष कार्कीले जानकारी दिनुभयो ।उहाँँका अनुुसार केन्द्रिय तथ्यांक विभागले सार्वजनिक गरेको तथ्यांक अनुसार जिल्लामा  जिल्लामा १ हजार ५० जना नागरिक संस्थागत रहेका छन् । दोलखामा ४७ हजार ८सय ४७ घरधुरीमा कुल ५० हजार ६ सय ५३ परिवार संख्या बसोबास गरीरहेको पाइएको  । जिल्लामा जनसंख्या बृद्धिदर वार्षिक माइनस शुन्य दशमलव ७४ प्रतिशत रहेको तथ्यांकले देखाएको हो । जिल्लाको भीमेश्वर नगरपालिका सवै भन्दा बढी ३५ हजार १सय २२ जना बसोबास गरीरहेको पाइएको छ भने जिरी नगरपालिकामा सवै भन्दा कम १५ हजार ५सय जनसंख्या बसोवास गरिरहेका छन् । जिल्लाको वैतेश्वरमा १७ हजार ९सय ४७ जना, विगुमा १६ हजार २सय ९९,गौरीशंकरमा १५ हजार ९ सय ८२, कालिञ्चोकमा २१हजार २ सय १० जना बसोबास गरिरहेका छन् भने मेलुङमा १६ हजार ५१ जना, शैलुङमा १८ हजार ३ सय २८ जना र तामाकोशी गाउँपालिकामा १५ हजार २ सय २७ जना जनसंख्या रहेको तथ्यांक सार्वजनिक भएको हो ।