माघ २५ –दोलखामा मतदाता नामावली सङ्कलनको काम स्थगित भएको छ । निर्वाचन आयोगले आजदेखि मतदाता नामावली सङ्कलनको काम स्थगित गर्ने निर्णय गरेसँगै दोलखामा पनि मतदाता नामावली सङ्कलनको काम स्थगित भएको निर्वाचन कार्यालय दोलखाका प्रमुख ओम प्रकाश महतोले जानकारी दिनुभयो । सरकारले स्थानीय तहको मिति तय गरेपछि आयोगले मतदाता नामावली सङ्कलनको स्थगित गरेको हो । जिल्लामा २०७७ साल माघ १३ गते सम्म निर्वाचन आयोगको तथ्याङका अनुसार १ लाख ५३ हजार २३ जना मतदाता रहेका छन्  । आयोगले सोमबारकै निर्णयबाट मंगलबारदेखि मतदाता नामावली संकलन गर्न रोक्ने निर्णय गरेको हो ।निर्वाचनको घोषणा गरेपछि त्यो निर्वाचनका लागि मतदाता नामावली संकलन गर्न नपाइने कानुनी व्यवस्था छ ।

अहिलेसम्म संकलन भएको नामावली निर्वाचन आयोगले वडा तहमा प्रकाशित गर्नेछ र त्यसमा दावी विरोध भए उजुरी दिन आह्वान गर्नेछ । र दावी विरोध भए छानबिनपछि अन्तिम नामावली प्रकाशित हुनेछ । त्यही अन्तिम नामावलीमा परेका मतदाताहरुले मात्रै आगामी स्थानीय निर्वाचनमा मतदान गर्न पाउनेछन् । यसका लागि करिब ३५ देखि ४० दिन लाग्ने आयोगको अनुमान छ ।