परोपकार महिला सहकारी संस्था दोलखाले शेयर सदस्यलाई आत्मनिर्भर बनाउन सिप विकास तालिमलाई जोड दिएको छ । सहकारीले ढाकाको मास्क,पर्स र व्याग बनाउने तालिम भर्खरै सम्पन्न गरेको छ । भीमेश्वर नगरपालिकासंगको साझेदारीमा ५ दिने तालिम सञ्चालन गरेको सहकारीले जनाएको छ । सिप सिकाईबाट महिलाहरुलाई आत्मनिर्भर बनाउन विगतका वर्षदेखि नै विभिन्न सिप विकास तालिमहरु संचालन गरिरहेको संस्थाकी अध्यक्ष सर्मिला सापकोटाले जानकारी दिनुभयो ।

शेयर सदस्य महिलाहरुलाई आत्मनिर्भर बनाउन विभिन्न योजनाका साथ काम शुरु गरेकोे अध्यक्ष सापकोटाको भनाइ छ । सिप विकास तालिमका साथैसहकारीबाट सहज आर्थिक लगानी गर्दै व्यवसाय विकासमा लैजाने समेत योजना रहेको उहाँले बताउनुभयो ।
छोटो समयको तालिमबाटै सहभागिले आकर्षक सामग्री उत्पादन गर्न सफल भएको भन्दै संस्थाकी उपाध्यक्ष अप्सरा चौलागाईँले सहभागिलाई व्यवसायिक बन्न आग्रह गर्नुभयो । सिप सिके पछि व्यवसाय सञ्चालन गरेर अगाडि बढ्ने सहभागिले प्रतिवद्धता व्यक्त गरेका छन् ।
तालिममा १७ जना शेयर सदस्यको सहभागिता रहेको थियो ।
यस अगाडि पनि सहकारीले शेयर सदस्यका लागि आयमूलक र सिपमूलक तालिम कार्यक्रम सञ्चालन गर्दै आएको छ ।