सुन्दर स्थल शैलुङ डाँडामा साहित्यिक महोत्सव गरिने भएको छ । शैलुङ गाउँपालिकाले ऐतिहासिक एवं पर्यटकीय गन्तव्य शैलुङडाँडाको प्रचारप्रसार एवम जिल्लामा साहित्यिक प्रवद्र्धनका लागि फागुन २० गते शुक्रबार महोत्सव गर्न लागेको अध्यक्ष भरत प्रसाद दुलालले बताउनु भयो । महोत्सवको उद्घाटन नेकपा एमालेका केन्द्रीय अध्यक्ष एवम पूर्व प्रधानमन्त्री केपी शर्मा ओलीले गर्नुहुने कार्यक्रम तय भएको छ राष्ट्रिय र स्थानीय गरी हजारौँको सहभागिता हुने अपेक्षा आयोजकले गरेको छ । कार्यक्रममा १५ लाख रुपियाँ खर्च हुने अनुमान गरिएको छ भने कार्यक्रमका लागि पालिकाले खर्च गर्ने गाउँपालिकाको भनाइ छ ।
शैलुङ डाँडा एउटा दोलखा जिलाको मात्र नभई नेपालकै रमणीय पर्यटकीय स्थलको रूपमा परिचित स्थल हो । समुद्री सतहबाट करीब ३ हजार ४ सय मिटर उचाईमा रहेको छ । शैलुङ डाँडा प्रकृतिले सुन्दर स्थलको रूपमा मात्र नभएर धार्मिक स्थलको रूपमा पनि परिचित छ । शैलुङ डाँडामा एक सय वटा मनमोहक सुन्दर थुम्काथुम्कीहरू रहेका छन् ।