राष्ट्रिय सहकारी बैंक दोलखा शाखाले सहकारीका बजार प्रतिनिधिहरुका लागि क्षमता विकास तालिमको आयोजना गरेको छ । सहकारीको वित्तीय विकासलाई व्यवस्थित र प्रभावकारी बनाउन वजार प्रतिनिधिलाई तालिम प्रदान गरेको राष्ट्रिय सहकारी बैंक दोलखा शाखा प्रमुख हेमन्त चौलागाईले बताउनु भयो । उहाँले भन्नुभयो “सहकारी संस्थामा माथिल्लो स्तरका कर्मचारीको मात्रै क्षमता विकासको परिपाटीले निरन्तरता पाएको अवस्थामा जुनियर स्टाफको क्षमता विकास अनिवार्य र अपरिहार्य लागेर तालिमको आयोजना गरेका हौं । यो कार्यक्रम जिल्लामा पहिलो पटक आयोजना गरिएकोले सहभागी सबै उत्साहित भएका छन् । आगामी दिनमा पनि निरन्तरता दिने छौ ।”

वचत तथा ऋणको कारोबार बैंकको मुख्य कार्य भएपनि सहकारी संस्थाहरुको स्तरीकरण,प्रवद्र्धन, वित्तीय विकास,का लागि बैंक सधै अग्रस्थानमा रहेर सहयोग गर्ने बताउनु भयो । उहाँले आगामी दिनमा व्यवसायिक योजना बनाउने,सस्तो व्याजदरमा कर्जा उपलब्धता,प्रविधिको विकाससंगै बजार व्यवस्थासम्म कार्य गर्दै जाने योजना रहेको जानकारी दिनुभयो । तालिम समापन कार्यक्रममा सहभागीहरुलाई शाखा प्रमुख चौलागाईले प्रमाण पत्र वितरण गर्नु भएको थियो । तालिम समापनमा सहभागिहरुले तालिम व्यवहारिक र उपयोगी भएको भन्दै आयोजकलाई धन्यवाद दिए  ।

कार्यक्रमको सहजीकरण तालिम प्रशिक्षक भोला खतिवडाले गर्नुभएको थियो ।