प्रमिला सेढाई,फागुन २९
ललितपुर महानगरपालिका र भीमेश्वर नगरपालिकाबीच भगिनी सम्झौतामा हस्ताक्षर सम्पन्न भएको छ ।
भीमेश्वर नगरपालिका र ललितपुर महानगरपालिका बीच प्राचिनकालदेखि कायम रहेको ऐतिहासिक, धार्मिक तथा साँस्कृतिक सम्बन्धलाई आत्मसाथ गर्दै दुई नगरबीच समझदारी पत्रमा हस्ताक्षर सम्पन्न भएको हो । भीमेश्वर नगरपालिकामा एक कार्यक्रमको आयोजना गरी भीमेश्वर नगरपालिकाका प्रमुख भरत बहादुर केसी र ललितपुर महानगरपालिकाका प्रमुख चिरीबाबु महर्जनले हस्ताक्षर गर्नु भएको थियो ।

कार्यक्रममा प्रतिनिधि सभाका माननीय सदस्य श्री पार्वत गुरु«ङको प्रमुख आतिथ्यतामा सम्पन्न कार्यक्रमको अवसर पारेर भीमेश्वर नगरपालिकाबाट प्रकाशित संघीयता र स्थानीय विकास, जनप्रतिनिधिका पाँच वर्ष नामक पुस्तक विमोचन गरिएको थियो । कार्यक्रमलाई सम्बोधन गर्दै प्रतिनिधि सभाका माननीय सदस्य एवम् पुर्व मन्त्री एवम् कार्यक्रमका प्रमुख अतिथि पार्वत गुरुङले भीमेश्वर नगरपालिका र ललितपुर महानगपालिकाबीच भगिनी सम्बन्ध भएकोमा खुशी व्यक्त गर्नु भयो ।सम्बन्धलाई थप प्रगाढ बनाउन सहयोग गर्ने प्रतिवद्धता व्यक्त गर्दै भगिनी सम्बन्धको स्थायित्वको शुभकामना दिनुभयो ।
कार्यक्रमका विशेष अतिथि चिरीबाबु महर्जनले देशकै पहिलो नगरपालिका ललितपुर र दोलखा जिल्लाको पहिलो नगरपालिका भीमेश्वरबीच भगिनी सम्बन्ध भएकोमा खुशी व्यक्त गर्दै पुरानो सम्बन्धलाई जीवन्त बनाउन यो समझदारी महत्वपूर्ण हुने विश्वास व्यक्त गर्नु भयो । मन्तव्यको क्रममा ललितपुर महानगरपालिकाले मन्दिरको शहरलाई स्मार्ट सिटीको रुपमा पनि चिनाउन विभिन्न कार्यक्रम सञ्चालन गरेको र भगिनी सम्बन्ध भएको नगरपालिकाको विकासमा सँधै साथ सहयोग गर्ने सुख दुखमा दुवै नगरपालिकासँग रहने प्रतिबद्धता व्यक्त गर्नु भएको थियो । जिल्ला समन्वय प्रमुख डबल पाण्डेले धार्मिक सांस्कृतिक, पुरातात्विक र ऐतिहासिक सम्बन्धले अनुभव आदान प्रदान गर्न संस्कृतिको संरक्षण गर्न, असल अभ्यासको आदान प्रदान गरी अरु पालिकाहरुको लागि समेत नमूना बन्ने विश्वास व्यक्त गर्नुभयो । नगरपालिकाका नगर प्रमुख भरत बहादुर केसीले हरिसिद्धीको जात्रा दोलखामा पनि पनि आउनु पर्ने परम्परालाई सम्झँदा ललितपुर र दोलखाको पुरानो सम्बन्ध रहेको कुरा उल्लेख गर्दै दुई नगरपालिका बीचको सम्बन्ध सुख र दुःख दूवै अवस्थामा सहयोगी हुने विश्वास व्यक्त गर्नुभयो । भीमेश्वर नगरपालिकाले जिरी नगरपालिकासँग पनि भगिनी सम्बन्ध राखेको समेत स्मरण गराउनु भयो । सम्बन्ध सुमधुर बनाई सुनौला अक्षरले लेखिने कुरा विश्वास र प्रतिबद्धता जनाउनु भएको छ ।
कार्यक्रममा पत्रकार महासंघका अध्यक्ष दिपशंकर चौलागाईले दुई नगरपालिकाबीच समझदारीपत्रमा गरिएको हस्ताक्षर र जनप्रनिधिका पाँच वर्ष पुस्तक सार्वजनिक गरिएकोमा खुशी व्यक्त व्यक्त गर्नु भएको थियो ।

कार्यक्रममा नगरपालिका उपप्रमुख कमला वस्नेतले स्वागत मन्तव्य राख्नुभएको थियो भने कार्यक्रमको सहजीकरण नगरका प्रमुख प्रशासकीय अधिकृत मान बहादुर खड्काले गर्नुभएको थियो ।

कार्यक्रममा ललितपुर महानगरपालिका प्रमुख चिरीबाबु महर्जन, जिल्ला समन्वयका प्रमुख डबल पाण्डे,निमित्त प्रमुख जिल्ला अधिकारी दिपक कोइराला, जिल्ला प्रहरी कार्यालयका प्रमुख, भीमेश्वर नगरकार्यपालिका एवम् नगर सभाका सदस्यहरु, ललितपुर महानगरकार्यापालिका प्रवक्ता राजु मर्हजन एवम् प्रतिनिधि, भीमेश्वर नगरपालिकाका कर्मचारीहरु, नागरिक समाजका प्रतिनिधि एवम् पत्रकारहरुको उपस्थिति रहेको थियो ।

कार्यक्रममा एक आपसमा नगरपालिकाको तर्फबाट समझदारी पत्र, प्रमाण पत्र र चिनोको आदान प्रदान समेत गरिएको थियो ।