चैत ८
जिल्ला प्रशासन कार्यालय दोलखाले चैत्र १० गतेबाट आलोपालो गरेर राष्ट्रिय परिचय पत्र वितरण गर्ने भएको छ । जिल्ला प्रशासन कार्यालय दोलखाले सार्वजनिक गरेको तालिकाअनुसार आईतबार जिरी नगरपालिका र बैतेश्वर गाउँपालिका, सोमबार मेलुङ र गौरीशङ्कर गाउँपालिका तथा मङ्गलबार विगु र तामाकोशी गाउँपालिकाका नागरिकका लागि राष्ट्रिय परिचय पत्र वितरण गर्ने जनाएको हो । त्यसैगरी बुधबार कालिञ्चोक र शैलुङ गाउँपालिका तथा बिहीबार र शुक्रबार भीमेश्वर नगरपालिकाका नागरिकले मात्र राष्ट्रिय परिचय पत्र बनाउन पाउनेछन् ।
राष्ट्रिय परिचय पत्र दर्ताका लागि कार्यालयमा एउटा मात्र स्टेशन रहेको र एउटा स्टेशनबाट दैनिक रुपमा ४५ देखि ५० वटासम्म मात्र परिचय पत्र दर्ता गर्न सकिन प्रशासन कार्यालय दोलखाका प्रशासकीय अधिकृत औलाख वहादुर आले जानकारी दिनुभयो ।उहाँका अनुसार सेवाग्राही समेत लामो समयसम्म लाइनमा बस्नुपर्ने अवस्था भएकोले अर्को व्यवस्था नभए सम्मकोस्टेशन संख्या थपको लागि समेत राष्ट्रिय परिचय पत्र तथा पञ्जिकरण विभागमा अनुरोध भईसकेको अधिकृत आलेको भनाई छ ।
यस अगाडि राष्ट्रिय परिचय पत्रका लागि जिल्ला प्रशासन कार्यालयको बाहिर विहानैदेखि भीड लाग्ने गरेको थियो ।