दोलखामा विभिन्न कार्यक्रमका साथ शिक्षक दिवस मनाइएको छ । नेपाल राष्ट्रिय शिक्षक संगठन जिल्ला समिति दोलखाले प्रशिक्षणात्मक कार्यक्रम सहित ४३ औ शिक्षक दिवस मनाएको हो । नेपाल राष्ट्रिय शिक्षक संगठन जिल्ला समिति दोलखाकी उपाध्यक्ष विमला दुलालको अध्यक्षतामा सम्पन्न कार्यक्रममा शिक्षा विकास तथा समन्वय इकाइ दोलखाका प्रमुख शङ्करबाबु श्रेष्ठले शिक्षण पेसा सबैभन्दा सम्मानित पेसा भएकाले यसको गरिमा कायम राख्न अनुरोध गर्नुभयो । समयअनुसार आफूलाई अब्बल बनाउन नतिजा देखिने गरी शैक्षिक कार्यक्षेत्रमा लाग्न सुझाव दिनुभयो । कार्यक्रमका प्रमुख अतिथि समेत रहनु भएका श्रेष्ठले मानिसको जीवनलाई निश्चित आकार दिन र सबै पेसा जन्माउन सक्ने जनशक्ति शिक्षक मात्र भएकोले शिक्षकको देन ठूलो रहेको कुरा स्मरण गराउनुभयो ।

कार्यक्रमलाई सम्बोधन गर्दै नेपाल राष्ट्रिय संगठन प्रदेश सदस्य रामप्रसाद सापकोटाले शैक्षिक र पेशागत आन्दोलनको नेपाल राष्ट्रिय शैक्षिक संगठनको आफ्नै इतिहास अत्यन्तै गर्वालो र दर्विलो रहेको भन्दै संगठनले हालसम्म आइपुग्दा रचनात्मक र नवाप्रवर्तनात्मक कार्यहरु गर्दै आएको स्मरण गर्नुभयो । संगठनले व्यवस्था परिवर्तनको लागि विभिन्न राजनीतिक आन्दोलन तथा राष्ट्रिय राजनीतिमा नेतृत्वदायी भूमिका, सामाजिक, पेशागत स्थायित्व एवम् शैक्षिक मुद्धाहरुलाई स्थापित गर्न गरिएका आन्दोलनहरु र समाज रुपान्तरणका हरेक आन्दोलनहरुमा नेपाल राष्ट्रिय शिक्षक संगठनको सधै अग्रणी भूमिका रहेको र अवका दिनमा पनि कतिपनि विचलित नभइ अगाडि बढ्न सबैसंग अनुरोध गर्नुभयो ।

कार्यक्रममा जिल्लाा विभिन्न स्थानीय तहका नेपाल राष्ट्रिय शिक्षक संगठन समितिका प्रमुख एवं प्रतिनिधिहरुले नेपाल राष्ट्रिय शिक्षक संगठनका गतिविधि र अवका दिनमा खेल्न सक्ने भूमिकाका विषयमा जानकारी गराउनु भएको थियो । भीमेश्वर नगरपालिका नेपाल राष्ट्रिय संगठनका अध्यक्ष राजन कार्की शैलुङका चन्द्रलााल घिसिङ,वैत्यश्वरबाट हरि केसी,विगुबाट रमेश वि.क.लगायतले भूमिकाका विषयमा जानकारी गराउनु भएको थियो ।

कार्यक्रमको अवसरमा शैक्षिक क्षेत्रमा योगदान गर्ने विभिन्न शिक्षक तथा शैक्षिक संस्थालाई सम्मान समेत गरिएको थियो ।