दोलखा
विनिता शिवाकोटी
मुलुककै नमुना र धनी गाउँपालिका बनाउने संकल्प गर्दै नेकपा एमाले गौरीशंकर गाउँपालिका दोलखाले घोषणापत्र सार्वजनिक गरेको छ ।
यही वैशाख ३० गते हुने स्थानीय तहको निर्वाचन लक्षित विगत ५ वर्षमा भएका कामको समीक्षा र आगामी ५ वर्षको प्रतिवद्धतासहित घोषणापत्र सार्वजनिक गरेको हो । घोषणापत्रमा गाउँपालिकामा कृषिको विकास गरी औद्योगिक ग्रामको स्थापना गर्ने र प्रत्येक घरमा रोजगारको व्यवस्था,लघु उद्यम स्थापनालाई प्राथमिकतामा राखिएको छ ।
यसैगरी पर्यटन पूर्वाधार तर्फ संसारकै सबैभन्दा बढी सगरमाथा आरोही रहेको बेदिङ र ना गाउँमा अन्तराष्ट्रिय पर्वतारोहण संग्रहालय स्थापना गर्न पहल गर्ने भनिएको छ । यसै गरी गाउँपालिकामा रहेका मठ,मन्दिर,गुफा,गुम्बा,तथा अन्य विविध विषयको सम्बद्र्धन र संरक्षणलाई जोड दिइएको छ । गाउँपालिकामा रहेका सुरेल,शेर्पा,तमाङ र गुरुङ जातिको संस्कृति संरक्षण र प्रदर्शन गरी पर्यटकीय विकास गर्ने उल्लेख गरिएको छ ।
महिला समानता र सशक्तीकरण तर्फ हरेक क्षेत्रमा महिलाको सहभागिता र प्रतिनिधित्व सुनिश्चित गरिने भनिएको छ भने कानुनी सचेतनाका कार्यक्रम अभियानका रुपमा लैजाने प्रतिवद्धतापत्रमा लेखिएको छ ।
गाउँपालिकामा रहेका गुम्बाहरुमा सम्भोटा लिपि शिक्षणको प्रबन्ध गर्ने,सबै माध्यमिक विद्यालयलाई क्रमश आवासीय विद्यालयको रुपमा विकास गर्ने,उच्च शिक्षा अध्ययनकालागि प्रोत्साहित छात्रवृत्तिको व्यवस्था गरिने भनिएको छ ।
घोषणापत्रमा बारै महिना सडक सुचारु,सडक संजाल र पूर्वाधार, सेवा सुशासन, सामाजिक न्यायसहितको नमुना र सम्बृद्ध गाउँपालिका बनाउने गरी २६ शीर्षकमा प्रतिवद्धता लेखिएको छ । घोषणा पत्रमा शिक्षा, स्वास्थ्य, कृषि स्रोत तथा वित्तीय व्यवस्थापन, उद्यमशीलता र रोजगारी, सामाजिक सुरक्षा कोषको व्यवस्थापनदेखि, पर्यटन, वातावरण तथा प्राकृतिक स्रोतको संरक्षण, रोजगारीको व्यवस्थापन, सामाजिक न्याय, कला र संस्कृति ,खेलकुद सूचना तथा सञ्चार,भुकम्पपछिका पुनः निर्माण र पुन स्थापना लगायतका विषयमा पाँच बर्षमा गरिने काम उल्लेख छ ।