दोलखा । तामाकोशी गाउँपालिका वडा नम्बर ३ जफेको धोक्रेबारीमा गएराति प्रेसर कुकरमा विष्फोटक पदार्थ विष्फोट भएको छ ।
घटनाको बारेमा जानकारी पाए लगत्तै सोमबार विहान जिल्ला प्रहरी कार्यालय चरिकोटबाट प्रहरी निरिक्षक निरञ्जन भट्टराईको नेतृत्वमा खटिएको प्रहरीले घटनास्थलमा पुगेर अध्ययन गरेको दोलखाका प्रहरी प्रमुख गंगा पौडेलले जानकारी दिनुभयो । प्रेसर कुकरमा विष्फोटक पदार्थ हालेर विष्फोट गराईएको भएपनि विष्फोट भएको वस्तु भने बम नरहेको प्रहरी प्रमुख पौडेलको भनाई छ ।
घटना कसले गराएको हो भन्ने विषयमा सुक्ष्म अनुसन्धान भईरहेको र शंकाको घेरामा रहेका व्यक्तिहरुको बारेमा कुनैपनि प्रमाण भेटिने बित्तिकै पक्राउ गर्ने तयारी प्रहरीको छ ।
राति करिब १२ बजेको समयमा नजिकै कुनै खतरनाक बस्तु विष्फोट भएको आवाज सुनेपछि त्रसित बनेका स्थानीयले आज विहान प्रहरीलाई खबर गरेका थिए । उक्त वडाका अध्यक्ष पदका उम्मेद्वार सन्तोष पोखरेलको घरनजिकै विष्फोट गरिएकोले आफूलाई त्रसित बनाउन विपक्षीहरुले त्यस्तो हर्कत गरेको हुन सक्ने पोखरेलको आशंका छ ।
विष्फोटक पदार्थको सम्बन्धमा नेपाली सेनाको बम डिस्पोजल टोलिले नै अनुसन्धान गरीरहेको पनि प्रहरी प्रमुख पौडेलले जानकारी दिनुभयो ।
वैशाख २६, २०७९