चरिकोट, २५ जेठ

जिल्लामा पैरवीको क्षेत्रमा काम गर्दै आएका नागरिक समाज संस्थाहरुको लागि पैरवी सम्बन्धि क्षमता अभिवृद्धि कार्यक्रम बुधबार दोलखा सदरमुकाम चरिकोटमा सम्पन्न भएको छ ।

हुराडेक नेपाल दोलखाले लुथरन वल्र्ड फेडेरेसनसँगको सहकार्यमा सञ्चालन गर्दै आईरहेको सामुदायिक सशक्तीकरण र विकासका लागि स्थानीय पहल परियोजनाले आयोजना गरेको कार्यक्रममा सामाजिक अभियन्ता तथा कप्सनका पुर्व अध्यक्ष भोला खतिवडाले नागरिक समाजका संस्था मार्फत हुने पैरवीका अभियानका बारेमा सहभागीहरुलाई जानकारी दिनु भएको थियो ।

सो अवसरमा खतिवडाले पैरवी के, किन र कसरी भन्ने वारेमा सहभागीहरुलाई जानकारी दिनु हुँदै पैरवी मार्फत नीति निर्माण, नीतिहरुको समिक्षा र नीति कार्यन्वयन गराउन सकिने बताउँनु भयो । यसै गरी कार्यक्रममा खतिवडाले पैरवीको सवाल पहिचान, सवाल छनोट प्रक्रियाको बारेमा पनि जानकारी दिनु भएको थियो । यसै गरी कार्यक्रममा पैरवी कार्यका लागि नीति नियमको विष्लेषण र लक्षित वर्गको पहिचानको बारेमा पनि सहभागीहरुलाई जानकारी गराईएको थियो ।

कार्यक्रममा हुराडेक नेपाल दोलखाका परियोजना संयोजक शेरबहादुर भुजेलले हुराडेक नेपाल दोलखाले विभिन्न सवालमा पैरवी अभियान सञ्चालन गर्दै आएको जानकारी दिनु भयो । कार्यक्रममा दोलखामा जिल्लामा क्रियाशील नागरिक समाज संस्थाका प्रमुख तथा प्रतिनिधि र सञ्चारकर्मीहरुको सहभागिता रहेको थियो ।