दोलखा ।

 जिल्ला समन्वय समिति दोलखाको प्रमुखमा गठबन्धनका उम्मेद्वार बर्जुराम घतानी  निर्वाचित हुनु भएको छ ।

बुधबार सम्पन्न निर्वाचनमा नेकपा एमालेका उम्मेद्वारहरुलाई ४ मतले पछि पार्दै नेकपा माओवादी केन्द्रका घतानीको नेतृत्वमा रहेको गठबन्धनको प्यानल नै निर्वाचित भएको हो । प्रमुखमा घतानीले ११ मत पाप्त गर्दा उहाँका निकटतम प्रतिस्पर्धी नेकपा एमालेका ऋषिकेशव उप्रेतिले ७ मत प्राप्त गर्नु भएको मुख्य निर्वाचन अधिकृत कविप्रसाद न्यौपानेले जानकारी दिनुभयो ।

त्यसैगरी उपप्रमुखमा पनि गठबन्धनका उम्मेद्वार नेकपा एकीकृत समाजवादीका दोर्जी शेर्पा विजयी हुनु भएको छ । सदस्यहरुमा गठबन्धनको तर्फबाट नेपाली काङ्ग्रेसका महिला सदस्यहरु मेलुङ गाउँपालिकाकी चन्द्रकला ठकुरी, कालिञ्चोक गाउँपालिकाकी कल्पना थामी र भीमेश्वर नगरपालिकाकी मेनुका चौलागाँई निर्वाचित हुनुभएको छ । दलित तथा अल्पसंख्यक सदस्य जिरी नगरपालिकाका मनफिन्जु शेर्पा, खुल्ला सदस्यमा बैतेश्वर गाउँपालिकाका अनिलकुमार तामाङ, शैलुङ गाउँपालिकाका कृष्ण बहादुर श्रेष्ठ र विगु गाउँपालिकाका टसी शेर्पा विजयी हुनुभएको छ ।

जिससको निर्वाचनमा जिल्लाका ९ वटा स्थानीय तहका प्रमुख, उपप्रमुख गरी १८ जना मतदाताले मतदान गरेका थिए ।