२०७९ असार ८

                             शैक्षिक परिवर्तन प्रतिष्ठान काठमाण्डौंले बुढा भीमसेनका बालबालिकालाई शैक्षिक सामग्री वितरण गरेको छ । दोलखाको भीमेश्वर नगरपालिका ५ मा रहेको बुढाभीमसेन माध्यमिक विद्यालय धरमघरका बालबालिकालाई ६० हजार रुपैयाँ बराबरको शैक्षिक सामग्री प्रदान गरेको हो ।

विद्यालय व्यवस्थापन समितिका अध्यक्ष सुमन थापाको अध्यक्षतामा सम्पन्न सामग्री वितरण कार्यक्रममा बालकक्षा देखि १० कक्षासम्म अध्ययनरत करिब १ सय ३५ जना बालबालिकालाई १ दर्जनका दरले कापी र पेन्सिल वितरण गरिएको विद्यालयका प्रधानाध्यापक राजन कार्कीले बताउनु भयो ।

कार्यक्रममा भीमेश्वर नगरपालिका वडा नं ५ का वडा सदस्य बालकृष्ण कुँवर,बुढाभीमसेन माध्यमिक विद्यालय व्यवस्थापन समिति सदस्य लक्ष्मी खड्का,विद्यालयका प्रधानाध्यापक राजन काकीले विद्यालयका बालबालिकाको शैक्षिक विकासका लागि प्रतिष्ठानले गरेको सहयोगको उच्च सम्मान गर्दै मुक्तकण्ठले प्रसंसा गर्नुभयो ।

दोलखा भीमेश्वर नगरपालिका वडा नं ५ का स्थायी बासिन्दा,शिक्षाप्रेमी एवं शैक्षिक परिवर्तन प्रतिष्ठान काठमाण्डौंका सचिवको भूमिकामा समेत रहनु भएका बाबुकाजी कार्कीको पहलमा शैक्षिक सामग्री प्राप्त भएको विद्यालयले जनाएको छ ।

कार्यक्रममा विद्यालय व्यवस्थापन समितिका पदाधिकारी,अभिभावक,शिक्षक र विद्यार्थीको सहभागिता रहेको थियो ।