२०७९ असार ८

दोलखाको भीमेश्वर नगरपालिका वडा नम्वर ५ का वडा अध्यक्ष बासु श्रेष्ठले वडामा रहेका सबै विद्यार्थीलाई पोशाक सहयोग गर्ने घोषणा गर्नुभएको छ । बुढा भीमसेन माध्यमिक विद्यालय धरमघरले आयोजना गरेको बधाई तथा सम्मान कार्यक्रममा बोल्ने क्रममा अध्यक्ष श्रेष्ठले बालबालिका लागि सहयोग गर्ने बताउनु भएको हो ।

अध्यक्ष श्रेष्ठले बालबालिकालाई लक्षित गर्दै भन्नुभयो,तपाईहरु राम्ररी पढ्नुहोस् तपाईको शिक्षामा कुनै अभाव हुन दिन्न,मेरो कार्यअवधि तपाईहरुको हितमा विताउने छु । आपनो वडामा रहेका कुनै पनि बालबालिका आर्थिक अभावले शिक्षाबाट वञ्चित हुन नदिने र विभिन्न कारणले समस्यामा परेका बालबालिकालाई सहयोग गर्ने योजना समेत सुनाउनुभयो ।

वडाको बजेट सिमित हुने र नगरपालिकाको शिक्षा नीति अनुसार चल्नु पर्ने भएकाले कतिपय बालबालिकाका समस्या सम्बोधन गर्न आफू व्यक्तिगत लगानी गर्न तयार भएको बताउनु भयो । नीति र वजेटले समेट्न मिल्ने बाहेकका कार्यक्रममा व्यक्तिगत लगानी गर्न पनि पछि नपर्ने अध्यक्ष श्रेष्ठको भनाई छ ।
कार्यक्रमलाई सम्बोधन गर्दै अध्यक्ष श्रेष्ठले यही बर्षबाट भीमेश्वर नगर वडा नं ५ का सबै सामुदायिक विद्यालयका बालबालिकालाई विद्यालय पोशाक ट्रयाकसुट र सेतो जुत्ता सहित आवश्यकताको आधारमा खेलकुद र शैक्षिक सामग्री सहयोग गर्ने समेत प्रतिवद्धता व्यक्त गर्नु भयो ।

वडाध्यक्ष श्रेष्ठले निर्वाचन अगाडि सरकारी सुविधा सामाजिक क्षेत्रमा लगानी गर्ने घोषणा समेत गर्नुभएको थियो । निर्वाचनका वाचा पूरा गर्ने क्रममा विद्यालयबाट लगानी शुरु गर्ने उहाँको भनाई छ ।