भीमेश्वर नगरपालिका ५ पीपल बोटमा आरोग्य केन्द्र बनेपछि जेष्ठ नागरिक हर्षित भएका छन् । दोलखाका धार्मिक तथा पर्यटकीय स्थल शैलुङ,कालिञ्चोक,हनुमन्ते,भीमेश्वर अनि तामाकोशीको दृष्यावलोकन गर्न सकिने सुन्दर स्थल पीपलबोटमा आकर्षक शैलीमा बनेको आरोग्य केन्द्रमा दुःख सुख साट्न पाउँदा जेष्ठ नागरिकले खुसी व्यक्त गरका हुन् ।
जेष्ठ नागरिक बालबालिका अन्तरक्रिया कार्यक्रमको अवसर पारेर जेष्ठ नागरिकले वडाध्यक्ष बासु श्रेष्ठ समक्ष खुसी प्रकट गर्दै सबै जेष्ठ नागरिक सम्म यस्तै सुविधा पु¥याउन माग गरे । भीमेश्वर नगरपालिकाको आयोजनामा गरिएको अर्ती पूर्खाको कार्यक्रम जेष्ठ नागरिक आरोग्य केन्द्रमा गरिएको थियो ।
८४ वर्षीय जेष्ठ नागरिक तिलक बहादुर कार्कीले खुसी हुँदै भन्नुभयो,“तामाकोशीको हावा खाँदै चारैदिशाका देवी देवताको दर्शन गर्न पाउँदा स्वर्गजस्तै लागेको छ । उमेर गै गयो यो अवसर हेर्दा धेरै बाच्न पाए हुन्थ्यो ।”
घरमै कुजिँएर बस्नुपर्ने वाध्यता थियो । आफूजस्तै साथीसंग भेट गर्न सजिलो ठाउँ बनादिए । बुढ्यौली पनि विर्साइदियो,७९ वर्षीय लिला कार्कीको भन्नुभयो ।
बाजागाजा छ,टेलिभिजन हेर्ने व्यवस्था छ,तातोन्यानो बस्ने ठाउँ छ अझै सामान्य चिया खाजाको व्यवस्था भए अझै राम्रो हुने जेष्ठ नागरिक गंगा बहादुर कार्कीको अपेक्षा छ ।
पीपल बोटमा आकर्षक आरोग्य केन्द्र बनेपछि टोल बस्तीमा पनि यस्तै आरोग्य केन्द्रको स्थापना गर्न जिल्ला जेष्ठ नागरिक संघका अध्यक्ष रङ्ग बहादुर बुढाथोकीले सुझाव दिनुभयो ।
जेष्ठ नागरिकका मागलाई सम्बोधन गर्दै वडा नं ५ का वडाध्यक्ष श्रेष्ठले जेष्ठ नागरिकको हितमा काम गर्ने वचन दिनुभयो । वडाले पहिलो पटक जेष्ठ नागरिकका लागि २ लाख रकम विनियोजन गरेको छ । व्यक्तिगत रुपमा पनि सहयोग गर्दै आएको छु । अझै आवश्यकता अनुसार सहयोग गर्दै जान्छु —उहाँले भन्नु भयो ।
अध्यक्ष श्रेष्ठले आरोग्य केन्द्रमा आउन मन हुने जेष्ठ नागरिकलाई गाडीको व्यवस्था गरेर पनि ल्याउने बताउनु भयो । कार्यक्रममा समाजसेवी तथा बुढाभीमसेन माध्यमिक विद्यालय धरमघरका प्रधानाध्यापक राजन कार्कीले आरोग्य केन्द्रलाई जेष्ठ नागरिक र बालबालिका बीच ज्ञान,सीप र अनुभव साट्ने र विकास गर्ने थलोको रुपमा विकास गर्न प्रयास गर्ने धारणा राख्नु भयो ।