नेकपा एमाले जिल्ला कमिटि दोलखाको पाँचौ पूर्ण बैठकले स्थानीय तहको निर्वाचन समीक्षा गर्दै पार्टी शुद्धीकरण र सुदृढीकरणको योजना निर्माण गरेको छ ।
दोलखा सदरमुकाम चरिकोटमा २ दिनसम्म सञ्चालन भएको वैठकले स्वर्गीय पशुपति चौलागाईँ स्मृति पुस्तक प्रकाशन गर्ने निर्णय गरेको छ । पुस्तक प्रकाशन नेकपा एमाले प्रचार प्रसार विभाग दोलखाले गर्ने जनाएको छ ।
बैठकले स्थानीय तहको निर्वाचनमा भएको अन्तरघात अध्ययन तथा छानविनका लागि नेकपा एमाले जिल्ला कमिटि दोलखाका उपसचिव धर्मेन्द मोक्तानको संयोजकत्वमा कार्यदल गठन गरेको छ भने जिल्ला कमिटि उपाध्यक्ष राजेन्द्र मानन्धरको नेतृत्वमा कार्यकर्ता कल्याण कोष स्थापना कार्यदल गठन गरेको छ ।

संगठन सुदृढीकरण तथा शुद्धीकरण अभियान सञ्चालन गर्ने,जनसंगठनहरुको सम्मेलन, गठन,पुनरगठन बैठक तथा सदस्यता विस्तार लगायतका कार्यक्रमलाई प्राथमिकतामा राख्ने निर्णय गरेकोे छ । पार्टीले श्रावण १४ गते जिल्ला पालिका तथा वडा कमिटिको प्रशिक्षण गर्ने,भाद्र १४ सम्म पार्टी सदस्यता नवीकरण गर्ने लगायतका निर्णय गरेको नेकपा एमाले जिल्ला कमिटि सदस्य लक्ष्मण थामीले जानकारी दिनु भयो ।

दोलखा सदरमुकाम चरिकोटमा आयोजना गरिएको बैठकलाई सम्बोधन गर्दै नेकपा एमाले एमाले वाग्मती प्रदेशका इन्चार्ज काँशीनाथ अधिकारीले आगामी निर्वाचनमा पार्टीको विजय सुनिश्चित गर्नेगरी अघि बढ्न निर्देशन दिनुभएको छ । बैठकमा एमाले पोलिट व्युरो सदस्य आनन्द प्रसाद पोखरेल, पोलिट व्युरो सदस्य पार्वत गुरुङ, केन्द्रीय सदस्य सरस्वती बस्नेत लगायतका नेताहरुले बैठकलाई सम्बोध गर्दै आगामी निर्वाचनको लागि रणनीतिक रुपमा अगाडि बढ्ने प्रतिवद्धता व्यक्त गरे ।

बैठकमा जिल्लामा गत बैशाख ३० गते सम्पन्न स्थानीय तह निर्वाचनमामा पराजित भएका पालिकाले निर्वाचनको समीक्षासहित प्रतिवेदन प्रस्तुत गरेका थिए ।
बैठकमा रिर्पोट प्रस्तुत गर्दै गाउँपालिका र वडाका नेताहरुले पार्टीभित्रको अन्तरविरोध र अन्तरघात, टिकट वितरणमा देखिएको समस्या, सत्तारुढ गठबन्धनले गरेको सत्ताको दुरुपयोग लगायतका कारण पार्टीले पराजय व्यहोर्नु परेको जानकारी गराए । स्थानीय तह निर्वाचनमा एमालेले जिल्लाका ९ मध्ये जिरी नगरपालिका र मेलुङ गाउँपालिकामा प्रमुख र उपप्रमुख तथा भीमेश्वर नगरपालिका, विगु गाउँपालिका र शैलुङ गाउँपालिकामा उपप्रमुख मात्रै जितेको छ । जिल्लाका ७४ मध्ये २४ वटा वडा एमालेले जितेको थियो । निर्वाचन पछि पार्टीले समीक्षासहितको वैठकको आयोजना गरेको हो ।

।