दोलखा, ११ भदौ ।
नेपाली महिलाहरु विशेष पर्व तीज नजिकिएसंगै तीजका विभिन्न कार्यक्रम भइरहेका छन् । जिल्लामा राजनीतिक दलका भगिनी संगठनदेखि गाउँपालिकाका वडा तहसम्म विभिन्न सिर्जनात्मक कार्यक्रम सहित तीज पर्वलाई स्वागत गरिरहेका छन् ।
वडा स्तरीय महिला वडा स्तरीय महिला सञ्जाल र कल्याणकारी महिला समूहले पनि कालिञ्चोक गाउँपालिका वडा नं ९ मा पनि तीज गीत प्रतियोगितासहित कार्यक्रम सम्पन्न गरेको छ । कल्याणकारी आमा समुहकी अध्यक्ष गोमा थामीको अध्यक्षतामा भएको कार्यक्रममा गाउँपालिकाका अध्यक्ष अर्जुन शिवाकोटीले शुभ कामना दिँदै पर्वको नाममा बढेको विकृति अन्त्य गर्दै मौलिकता बचाउन सुझाव दिनुभयो । समयसंगै पर्व मनाउने पद्धतिमा पनि परिस्कृत गर्दैै जानु पर्ने बेला आएको धारणा राख्नुभयो । उहाँले भन्नुभयो,“अर्को वर्षको तीजमा महिलाको सीप प्रदर्शन गरौ र पुरस्कृत गरौं । महिलाहरुलाई आत्मनिर्भरताको बाटोमा लैजान उत्प्रेरणा भरौं । मन्तव्यकै क्रमममा अध्यक्ष शिवाकोटीले अवस्था हेरेर तीज मनाउन र स्वास्थ्य हेरेर ब्रत बस्न पनि आग्रह गर्नुभयो ।

कार्यक्रममा बोल्दै वडा नं ९ का वडाध्यक्ष रामप्रसाद मैनालीले मौलिकता बचाउन र तीजलाई भड्किलो बनाउन नदिन को लागि प्रत्येक वर्ष वडाले तीज विशेष कार्यक्रम गर्दै आएको स्मरण गर्नुभयो । साँस्कृतिक पर्व तीजलाई तडक–भडकपूर्ण होइन एकता र सद्भावको लागि एक हुने अवसरका रूपमा मनाउनुपर्नेमा जोड दिनुभयो । वडाध्यक्ष मैनालीले वर्षमा एकदिन मात्र होइन हक अधिकारका लागि प्रत्येक दिन बाहिर निस्कन महिलालाई आग्रह गर्नुभयो ।

कार्यक्रममा अधिकारकर्मी रिता रिमालले परम्परादेखि मनाउँदै आएको तीज पर्व लाउने खाने प्रतिस्पर्धा मात्रै नभएर प्रतिफल देखिने गरी काममा लाग्न महिलालाई आग्रह गर्नुभयो । राज्यका हरेक तहमा महिलाको अर्थपूर्ण सहभागिता आवश्यक भएको बताउदै चाडपर्वले राजनीतिक र सामाजिक व्यवस्थामा परिवर्तन ल्याउन सङ्गठित हुने मौकाका रूपमा मनाइएको स्मरण गर्नुभयो ।

कार्यक्रमको अवसरमा आयोजना गरिएको तीज गीत प्रतियोगितामा पशुपति आमा समूह प्रथम,लेकाली आमा समुह द्वितीय,निलकमल आमा समूह तृतीय भएका छन् । विजयी प्रतियोगितालाई गाउँपालिका अध्यक्ष अर्जुन शिवाकोटीले पुरस्कार वितरण गर्नु भएको थियो ।
कार्यक्रममा बालबालिका तथा समुह समुहमा महिलाहरुले नेपाली तीजका गीतहरुमा नृत्य प्रस्तुत गरेका थिए ।