दोलखा जिल्लामा डेंगु रोगको संक्रमण पुष्टि भएको छ ।
चरिकोटस्थित पशुपति चौलागाँई स्मृति अस्पतालमा स्वास्थ्य परीक्षण गर्ने क्रममा तीनजनामा संक्रमण पुष्टी भएको अस्पतालका डाक्टर विनोद दंगालले जानकारी दिनुभयो । उहाँका अनुसार संक्रमित  हुने तीनैजना मेलुङ गाउँपालिकाका रहेका छन् । तीन जनामध्य दुईजना वयस्क र एकजना बच्चा रहेका छन् ।
भदौ १४ गते मङ्गलबार, बुधबार र बिहीबार एक÷एक जना गरी तीन जनामा संक्रमण पुष्टी भएको अस्पतालले जनाएको छ । संक्रमित तीनैजनाको पशुपति चौलागाँई स्मृति अस्पतालमा उपचार भईरहेको छ । उनीहरु तीनैजना यसअघि काठमाण्डौं यात्रा गरेर फर्किएका व्यक्ति रहेका डाक्टर दंगालले बताउनुभयो । तराई क्षेत्र तथा काठमाण्डौंमा उपत्यकामा अहिले तीव्र रुपमा डेंगुको संक्रमण भेटिएकोले यात्राका क्रममा लामखुट्टेको टोकाईबाट संक्रमण सरेको हुनसक्ने उहाँको अनुमान छ ।
डेंगुको संक्रमण हुन नदिन विशेष गरी लामखुट्टेको टोकाईबाट बच्न उहाँले आग्रह गर्नुभयो ।