ऐतिहासिक शहर दोलखा बजारमा निर्माणधीन मुद्रा तथा सास्कृतिक संग्रहालयको काम ७० प्रतिशत सम्पन्न भएको छ ।
दोलखा जिल्लाको दोलखा बजारस्थित राजकुलेश्वर तलेजु मन्दिर परिसरमा जिल्लाकै नमुना संग्रहालय निर्माण भइरहेको हो ।
बाग्मती प्रदेश सरकारको बहुवर्षिया ठेक्का मार्फत भ्याट सहित ३ करोड ७३ लाख ८६ हजारको लागतमा २०७७ पुसबाट सुरु भएको मुद्रा तथा सास्कृतिक संग्रहालयको काम जेठसम्ममा सक्ने गरी काम भएको थियो ।
तुल्सी÷एरिसा जेभीले ठेक्का पाएको उक्त संग्रहालयको काम विविध कारणले तोकिएको समयमा सम्पन्न नभएकाले ६ महिनाको म्याद थप गरी मंसिरसम्ममा काम सम्पन्न गर्ने तयारी रहेको निर्माण कम्पनीले जनाएको छ ।
नेपालको इतिहासमा नै पहिलो चादीको सिक्का निष्कासनको काम दोलखाबाट नै सुरु भएको प्रमाण रहेको स्थानीय समाजसेवी शान्तकृष्ण श्रेष्ठको भनाई छ ।
बाग्मती प्रदेशको पर्यटन विकास आयोजना मार्फत निर्माण भइरहेको संग्रहालयको टायल राख्ने, वाल लगाउने, फिनिसिङ र रंगरोगनको काम बाकी रहेको निर्माण कम्पनीले जनाएको छ ।
नेपाल भाषाको उद्गम स्थल मानिएको दोलखामा लोप हुने र नास हुने अवस्थामा रहेका पुरातात्विक महत्वका सम्पदाहरु र मानव सभ्यताको संस्कृतीसंग गासिएका पुराना सामग्रीहरु संग्रहालयमा सुरक्षित रुपमा राखी सर्वसाधारण तथा पर्यटकहरुको अवलोकन गर्ने गरी काम भइरहेको वडा अध्यक्ष स्टालिन श्रेष्ठले बताउनुभयो ।

राजा इन्द्र सिंहदेवले १६०५ मा सिक्का प्रचलनमा ल्याएपछि दोलखामा निर्माण भएको सिक्का काटने घर भुकम्पपछि भग्नावेशमा परिणत भएको छ ।