दोलखामा पहिलो पटक साबन उद्योग सञ्चालन भएको छ । भीमेश्वर नगरपालिका वडा नं ७ महादेव खोला मकैवारीमा साबुन उद्योग सञ्चालनमा आएको हो।
स्थानीय शिव केसीको लगानीमा केसी सप एण्ड केमिकल इण्डष्ट्री प्रालि मार्फत आधुनिक साबुन उद्योग सञ्चालनमा आएको छ ।
उत्पादित साबुन यही आश्विन महिनाबाट दोलखा सदरमुकाम चरिकोटको बजारमा उपलब्ध भएको उद्योगका कार्यकारी निर्देशक शिव केसीले बताउनु भयो ।
करिब ७ करोडको लगानीमा सञ्चालन गरिएको उद्योगमा उत्पादित साबुनको नाम फोर एक्स र पुर्खा राखिएको छ ।
उद्योगबाट उत्पादित साबुन जिल्लाको विभिन्न बजार तथा छिमेकी जिल्ला रामेछाप,सिन्धुली,ओखलढुङ्गा,सोलुखुम्बु,सिन्धुपाल्चोक,काभ्रेपलाञ्चोक,काठमाण्डौ,भक्तपुर,ललितपुर लागयतका जिल्लामा पठाउने योजना रहेको निर्देशक केसीको भनाई छ ।

उद्योगबाट हाल लुगा धुने सावुन,झोल सावुन,भाडा धुने सावुन,सरफ,हार्पिक,र फिनेल उत्पादन भइरहेको छ । उद्योगमा ९ जना स्थानीयले रोजगारी पाएका छन् भने उत्पादनमा बृद्धिसंगै २५ जना सम्मले रोजगारी प्राप्त गर्न सक्ने सम्भावना रहेको उद्योगले जनाएको छ ।