बुथकब्जा भएको स्थानमा पुन निर्वाचन गर्ने आयोगको निर्णयको नेकपा एमाले दोलखाले स्वागत गरेको छ ।
नेकपा एमाले दोलखाका कार्यवाहक अध्यक्ष राजेन्द्र मानन्धरले निर्वाचन आयोगको निर्णयबारे नेकपा एमाले दोलखाको १२ बुदे धारणा सार्वजनिक गदै स्वागत गर्नुभएको हो ।

बुथकब्जा भएको स्थानहरूमध्ये ४ स्थानमा मात्र पुन निर्वाचन गर्ने आयोगको निर्णय आशिंक सुधारको कदम भएको भन्दै स्वागतगरेको छ ।
आयोगको निर्णयले दोलखामा तीन दशकदेखि बुथ कब्जा गरेर जित्ने दल र नेताहरू नैतिक रूपमा परास्त भएको भन्दै प्रजातन्त्र प्राप्तपछि २०५१ सालको निर्वाचनदेखि मतदान गर्न नपाएका जनताहरूमा न्यायको अनुभूति भएको कार्यवाहक अध्यक्ष राजेन्द्र मानन्धरले बताउनुभयो ।
गैरराजनीतिक कृयाकलाप र गुण्डाको प्रयोग गरेर मारपिटबाट चुनाव जित्ने कुसंस्कारको अन्त्य भएको भन्दै बुथकब्जा प्रमाणित भएको भुसाफेदा, कालिञ्चोक, जुके, गैरीमुदी पिपलबोट, कालापानी, झुले, मालु, जुँगुमा आयोगले थप पहलकदमी लिन आग्रह गरेको छ ।
नेकपा एमाले दोलखाले मतदान सम्पन्न भए लगतै मंसिर ४ गते साँझ दोलखाको बैतेश्वर गाँउपालिका वडा नम्बर १, २, ३ र ६, तामाकोशी गाँउपालिका वडा नम्बर ३, मेलुङ गाँउपालिका वडा नम्बर ४, गौरीशङ्कर गाँउपालिका वडा नम्बर २, कालिञ्चोक गाँउपालिका वडा नम्बर १ र शैलुङ गाँउपालिका वडा नम्बर २ मा गठबन्धन दलले बुथ कब्जा गरी फर्जी मत खसालेको भन्दै मुख्य निर्वाचन अधिकृतको कार्यालय दोलखामा उजुरी गरेको थियो ।