निलकमल कृषि सहकारी कालिञ्चोक गाउँपालिका ८ सुनखानीको ९ औ साधारण सभाले कल्पना खरेल शर्माको अध्यक्षतामा ११ सदस्यीय नयाँ सञ्चालक समिति चयन गरेको छ । समितिको उपाध्यक्ष देवका खरेल,सचिव नारायण शिवाकोटी,कोषाध्यक्ष गणेशराज खरेल,सहसचिव निर्मला दहाल चयन भएका हुन् ।
यसैबीच लेखा समिति संयोजक ईश्वरी खड्का कार्कीको संयोजकत्वमा लेखा समिति चयन गरिएको संस्थाले जनाएको छ । सहकारी संस्थाकी अध्यक्ष प्रतिमा शिवाकोटीको अध्यक्षतामा सम्पन्न साधारण सभामा संस्थाका सचिव नारायण शिवाकोटीले प्रगति प्रतिवेदन र कोषाध्यक्ष गणेशराज खरेलले आर्थिक प्रतिवेदन प्रस्तुत गर्नुभएको थियो ।
सहकारीले कृषकलाई मल वितरण गर्दै आएको छ भने २५ रोपनी जग्गामा सामुहिक अदुवा खेती,कृषकका कफी संकलन तथा बजार व्यवस्थापनको काम गर्दै आएको छ । यसै गरी सहकारीले वृहत्त कफी खेतीको योजना आगामी कार्यक्रममा समावेश गरेको संस्थाका संरक्षक टहल आचार्यले बताउनु भयो ।
संस्थामा जम्मा १ हजार ४ सय ७१ सदस्य रहेका छन् । संस्थाको हालसम्मको कुल पूँजी ३ करोड ५ लाख रहेको संस्थाले जनाएको छ ।