चरिकोट, १ माघ
विष्णुलक्ष्मी साहित्यिक पुरस्कार समिति दोलखाले हरेक वर्ष माघ १ गते प्रदान गर्दै आएको विष्णुलक्ष्मी÷तुलसीमाया साहित्य सम्मान २०७९ साहित्यकार रविन्द्र तमाङलाई प्रदान गरिएको छ । पत्रकार चिरञ्जीवी मास्केले आफ्ना आमाहरु विष्णुलक्ष्मी श्रेष्ठ (कर्म दिने) र तुलसीमाया मास्के (जन्म दिने) को नाममा स्थापना गर्नु भएको यो पुरस्कार यो वर्ष तमाङलाई प्रदान गरिएको हो ।
पत्रकार मास्केले आपनो जन्मदिनको अवसर पारेर सो पुरस्कार प्रदान गर्दै आउनु भएको छ । हालसम्म ११ जना स्रष्टाले सम्मान प्राप्त गरिसकेका छन् ।

कार्यक्रमको अवसरमा विष्णुलक्ष्मी साहित्यिक पुरस्कार समितिले हरेक वर्ष प्रकाशन गर्दै आएको प्रदेय साहित्यिक पुस्तकसमेत सार्वजनिक गरिएको छ । पुस्तकमा जिल्लाका ३८ जना सर्जक र स्रष्टाका लेख रचना समेटिएका छन् ।

विष्णुलक्ष्मी साहित्यिक पुरस्कार समिति दोलखाका अध्यक्ष विष्णु सुवेदीको अध्यक्षतामा सम्पन्न पुरस्कार वितरण तथा पुस्तक सार्वजनिक कार्यक्रममा वाग्मती प्रदेश सभा सदस्य भरतबहादुर केसीले कला, साहित्य र संस्कृतिको क्षेत्रको विकासले मात्र समग्र सम्बृद्धि सम्भव भएको धारणा राख्नुभयो । सांसद केसीले साहित्यिक क्षेत्रको विकाससंगै अरु विकास गर्न सकिने भन्दै राजनीनितिक रुपमा विभक्त नभएर विकासका लागि एक भएर लाग्न आवश्यक भएको बताउनु भयो । समग्र जिल्लाको विकासका लागि प्रतिवद्ध भएर लाग्ने विश्वास व्यक्त गर्नुभयो ।

कार्यक्रममा भीमेश्वर नगरपालिकाका प्रमुख ईश्वर नारायण मानन्धर, प्रमुख जिल्ला अधिकारी भोजराज खतिवडा,मेलुङ गाउँपालिकाका अध्यक्ष हिरा कुमार थोकर, मेलुङ गाउँपालिकाका उपाध्यक्ष गायत्री आचार्यले स्थानीय तहको कला,साहित्य,भाषा,धर्म संस्कृतिको विकासका लागि वातावरण बनाउने प्रतिवद्धता व्यक्त गर्नुभयो ।

कार्यक्रममा विष्णुलक्ष्मी साहित्यिक पुरस्कार समितिका संरक्षक चिरञ्जीवी मास्के, दोलखा संस्कृति प्रतिष्ठान दोलखाका अध्यक्ष शंकरलाल श्रेष्ठ, नेपाल पत्रकार महासंघ केन्द्रीय समिति सदस्य रमेश खतिवडा,नेपाल पत्रकार महासंघ दोलखा शाखाका अध्यक्ष दीपशंकर चौलागाईँ,विष्णुलक्ष्मी पुरस्कार समितिका सचिव जीवन लामा लगायतले कला,साहित्य र पत्रकारिताको माध्यमबाट दोलखालाई चिनाउनु पर्ने धारणा राख्नुभयो ।
कवि एवं गजलकार जीत कार्की र कवि विष्णु सुवेदीले रचना वाचन गर्नु भएको थियो ।