दोलखाको कालिञ्चोक गाउँपालिकामा ३ दिने निःशुल्क स्वास्थ्य शिविर सम्पन्न भएको छ । सुस्वास्थ अस्पताल काठमाण्डौको आयोजना र कालिञ्चोक गाउँपालिकाको सहकार्यमा गरिएको शिविरमा ३ सय ७४ जनाले सेवा लिएका हुन् । सेवा लिनेमा २ सय ३२ महिला र १ सय ४२ पुरुष रहेको सुस्वास्थ अस्पतालका सञ्चालक सुदर्शन बस्नेतले जानकारी दिनुभयो ।
शिविरमा कम्मर दुख्ने, गर्दन दुख्ने, घुँडा दुख्ने, नसा च्यापिएको, हड्डी खिएको, वाथ रोग, माइग्रेन र पिनासको फिजियोथेरापी, अकुपंचर र प्राकृतिक उपचार पद्धतिद्धारा स्वास्थ्य जाँच तथा उपचार गरिएको हो ।

सुस्वास्थ्य अस्पतालका ८ जना विशेषज्ञसहित टोलीले कालिञ्चोक गाउँपालिका वडा नं ४,६,७,८ र ९ साथै भीमेश्वर नगरपालिका १ का नागरिकहरुलाई स्वास्थ्य सेवा प्रदान गरेको हो । शिविरमा नेपाल रेडक्रश सोसाइटी उपशाखा सुन्द्रावती,दीपज्योति समाज सुधार संघ संस्था र कालिका युवा क्लव सुन्द्रावतीले सहआयोजनकको भूमिका निर्वाह गरेका थिए । प्रत्येक वर्ष सुस्वास्थ्य अस्पतालले शिविर कार्यक्रमलाई निरन्तरता दिने बताएको छ ।