दोलखा भीमेश्वर नगरपालिकामा दलित महिलाहरुका लागि पञ्चेवाजा तालिम सञ्चालन गरिएको छ । भीमेश्वर नगरपालिका वडा नं ५ को सहयोगमा वडाका महिलाको क्षमता विकासका साथै लोक संस्कृतिको संरक्षणका लागि तालिमको आयोजना गरिएको वडाध्यक्ष बासु श्रेष्ठले बताउनुभयो ।
भीमेश्वर नगरपालिका वडा नं ५ धरमघरमा आयोजित पञ्चेवाजा तालिम कार्यक्रमको उद्घाटन गर्दै कार्यक्रमका प्रमुख अथिति एवं समाजसेवी कृष्ण बहादुर कार्कीले सञ्चार र प्रविधिले फड्को मारिरहेका बेला स्थानीय स्तरका मौलिक संस्कृति जोगाउन वडाले गरेको प्रयासको खुलेर प्रसंसा गर्नुभयो । कार्यक्रममा बोल्दै प्रमुख अथिति कार्कीले आपना मौलिक कला संस्कृति ओझेलमा पर्न नदिन पुस्तान्तरणको आवश्यकता रहेको भन्दै तालिम सफलताको शुभकामना दिनुभयो ।

पञ्चेवाजा संरक्षणमा वडाका महिलालाई व्यवसायिक बनाउने वडाध्यक्ष बासु श्रेष्ठको भनाइ छ । “पञ्चेवाजामा युवाको आकर्षण कम हुदै गएको छ । युवा समूह विदेश पलायन हुने समस्या एकातिर छ । अर्कोतर्फ महिलालाई दक्ष बनाउन र दीगो लोक संस्कृतिको संरक्षणमा महिलाको स्थायित्वको सम्भावना बढी भएको कारण तालिमको आयोजना गरिएको हो । वडाका महिलालाई नमुना पञ्चेवाजा टोलीको रुपमा विकास गर्न वडाले सकेको सहयोग गर्नेछ । ” वडाध्यक्ष श्रेष्ठले भन्नुभयो ।

स्थानीय र प्रदेश सरकारले सीप मुलक तालिमका नाममा वर्षेनी कराडौँ बजेट सकिरहेका बेला वडामा मौलिकता जोगाउदै पुस्तान्तरण गर्नुपर्छ भन्ने सकारात्मक पहल भएकोमा स्थानीय अगुवा महिला तारा नेपालीले खुसी व्यक्त गर्नुभयो । आपनै घरआँगनमा तालिम लिन पाएको भन्दै स्थानीय महिला उत्साहित भएका छन् ।

तालिममा स्थानीय भुवन नेपाली र रामकुमार नेपालीले सहनाई,कृष्ण बहादुर नेपालीले ढोलक र ट्याम्को,भक्त बहादुर नेपालीले नरसिंहा,लोक बहादुर नेपालीले दमाह र कर्नाल बजाउने तालिम दिनु हुनेछ ।  १५ दिनसम्म सञ्चालन हुने तालिमममा वडाका २० महिलाको सहभागिता रहने छ ।