दोलखाको भीमेश्वर नगरपालिका कार्यपालिका सदस्य र महिला वडा सदस्यहरुका लागि एक दिने प्रभावकारी समावेशी शुसासन सुद्धढीकरण कार्यक्रम आयोजना गरिएको छ ।

दलित महिला केन्द्र नेपालको आयोजना, भीमेश्वर नगरपालिकाको समन्वय र द एसिया फाउण्डेशनको सहयोगमा भएको कार्यक्रममा नगरपालिका कार्यपालिका सदस्य र महिला वडा सदस्यहरुको सहभागीता रहेको दलित महिला केन्द्र नेपाल दोेलखाका फिल्ड अधिकृत रविन्द्र विकले जानकारी दिनुभयो ।

उहाँका अनुसार कार्यक्रममा नगर कार्यपालिका सदस्य र महिला वडा सदस्यहरुको नेतृत्व विकास र निर्णायक भुमिकामा अर्थपूर्ण सहभागिता बृद्धि गर्न सहज बनोस भन्ने उद्देश्यले कार्यक्रमको आयोजना गरिएको हो । लैंगिक समानता तथा सामाजिक समावेशीकरणको लागि महिला, दलित महिला, अपांगता भएका व्यक्ति तथा सिमान्तकृत महिलाहरुको सामुहिक पहल आवश्यकता सम्बन्धी छलफल, महिला वडा सदस्यहरु र कार्यपालिका सदस्यहरुको भूमिका र जिम्मेवारी, लैंगिक समानता तथा सामाजिक समावेशीकरणका लागि राजनीतिमा महिलाको सहभागिताको आवश्यकता, महत्व,समस्या तथा चुनौतिहरुसंगै नेतृत्वकलाका विषयमा मेन्टर कालिका पाठकले सहजीकरण गर्नुभएको थियो ।
पूर्व जनप्रतिनिधि एवम् कालिन्चोक गाँउपालिकाका पूर्व उपाध्यक्ष एवम् महिला अधिकारकर्मी कालिका पाठकले सहजीकरण तथा मेन्टरिङ गर्नु भएको हो।
कार्यक्रम करिव छ महिना सम्म चल्ने कुराको जानकारी दलित महिला केन्द्र नेपालले जनाएको छ । वडावाट निर्वाचित महिला जनप्रतिनिधिहरुको क्षमता विकास र विकासमा अर्थपूर्ण सहभागिता र समान समावेशीकरणका वजेटका लागि कार्यक्रम भएको आयोजक संस्थाको भनाइ छ ।