भीमेश्वर नगरपालिका वडा नं ५ का महिला समूहले पञ्चेबाजा बजाउँदै आज भीमेश्वर नगरपालिकाका प्रमुख ईश्वर नारायण मानन्धरलाई स्वागत गरेका छन् । बुढाभीमसेन माध्यमिक विद्यालय धरमघरको ५४ औं स्थापना दिवसको अवसर पारेर विद्यालय पुग्नु भएका प्रमुख मानन्धरलाई पञ्चेबाजा बजाएर स्वागत गरेका हुन् ।
भीमेश्वर नगरपालिका वडा नं ५ को सहयोगमा १५ दिने तालिम लिएका महिलाले तालिम अवधिमा नै पञ्चेवाजा बजाएर स्वागत गरेपनि प्रमुख मानन्धरले खुसी व्यक्त गर्दै महिला समूहलाई धन्यवाद दिनुभयो । महिलाको क्षमता विकास भए घर परिवार र समाज खुसी हुने भन्दै आफूले चाहेको समाज निर्माणमा महिलाले गरेको कामको प्रसंसा गर्नुभयो ।

पञ्चेबाजा महिला समूहलाई पोसाक तत्काल उपलब्ध गराउने,बाजा खरिद र व्यवस्थापनसंगै सिप विकासका लागि पुनरताजगी तालिम व्यवस्थापनको जिम्मा लिने समेत प्रमुख मानन्धरले विश्वास दिलाउनु भयो ।
दोलखा जिल्लामा नै पहिलो पटक महिलाले पञ्चेबाजा बनाउन तत्परता देखाएपछि वडा नं ५ का वडाध्यक्ष बासु श्रेष्ठले खुसी व्यक्त गर्नुभयो । नमुना पञ्चेबाजा टोली बनाउन वडाले आवश्यक सहयोग गर्ने उद्घोष गर्नुभयो ।
उर्जाशील भएर महिला समूहले पञ्चेबाजा बजाएको देखेर स्थानीयले खुलेर प्रसंसा गरे ।