चैत ८
विनिता शिवाकोटी

दोलखाको भीमेश्वर नगरपालिकामा रहेको बुढाभीमसेन मन्दिर परिसरमा आयोजित महायज्ञमा कथा श्रवण गर्नेहरुको घुइँचो लागेको छ ।
आइतबारबाट शुरु भएको महायज्ञमा दैनिक संयौको सङख्यामा भक्तजनहरुको भिड लाग्ने गरेको आयोजकको भनाइ छ ।
महायज्ञमा दोलखाका जिल्लाका विभिन्न स्थानदेखि छिमेकी जिल्लाबाट पनि भक्तजनहरुको आउनेक्रम दिनप्रतिदिन बृद्धि हुँदै गएको महायज्ञ मूल आयोजक समितिका सदस्य राजन श्रेष्ठले बताउनु भयो ।

विश्व शान्तिको कामना,पितृ उद्दार तथा धार्मिक पर्यटनको विकास गर्ने उद्देश्यले ११ दिनसम्म सञ्चालन गर्न लागिएको महायज्ञको प्रमुख आकर्षक कल्याणी माता रहनु भएको छ भने प्रमुख वाचक कृष्ण प्रसाद गुरागाईँ र उपवाचकमा चन्द्रमणि गुरागाईँ रहनु भएको छ ।

भीमेश्वर नगरपालिका वडा नं ५ मा रहेको बुढाभीमसेन धाममा सञ्चालन भएको शिव पुराणमा ओम शीव शक्ति कल्याणी केन्द्र,केन्द्रीय कार्यालयका शाखा प्रमुख,साधक,साधवी,कुमार कुमारी र राष्ट्रिय कलाकारहरुको उपस्थिति रहेको छ ।
प्रत्येक साँझ ७ बजेदेखि १० बजेसम्म राष्ट्रिय कलाकार तथा सङ्गीतकारहरुबाट भक्ति सङ्गीत, कथा महात्म्य सञ्चालन भइरहेको छ भने चैत्र १५ गते दिनको १ बजे पूर्णाहुती, तिलार्चन एवम् समापन कार्यक्रम रहेको आयोजकको भनाइ छ ।

महायज्ञको उद्घाटन वागमती प्रदेश सभा सदस्य भरत केसीले गर्नुभएको थियो ।
कार्यक्रममा भीमेश्वर नगरपालिकाका प्रमुख ईश्वर नारायण मानन्धर,भीमेश्वर नगरपालिका वडा नं ५ का वडाध्यक्ष बासु श्रेष्ठ,धार्मिक एवं सामाजिक संघसंस्थाका प्रमुख एवं प्रतिनिधिको बाक्लो उपस्थितिमा उद्घाटन कार्यक्रम सम्पन्न भएको थियो ।

पहिलो दिन बुढाभीमसेन मन्दिरबाट महिला पञ्चेबाजा,पौराणिक भजन कृतनको साथमा कलश यात्रासहित सयौको सङख्याका धर्मावलम्बीहरु कोटीहोम हँदै नगर परिक्रमा गरी महायज्ञ स्थलमा पुगेर उद्घाटन कार्यक्रम सम्पन्न भएको थियो ।

स्कन्द पुराणका अनुसार लोक कल्याणका लागि भगवान भीमशङ्कर ज्योतिलिङ्गका रुपमा दोलखाको धर्मगृह (धरमघर) मा आएर बस्नुभएको थियो ।
स्वस्थानी व्रतकथाका अनुसार महादेवले किराँतेश्वरको रुपमा वन विहार गरेको स्थल भएको विश्वास गरिएको छ भने वन विहारको क्रममा किराँतीछाप धर्मघर हुँदै भीमेश्वर दोलखा गएर भीमसेनले बास गरेको इतिहास रहेको स्थानीय अग्रजको भनाइ रहेको छ ।

हालको धरमघर आसपासका स्थानहरुमा सीतापाइला,सीताको चुल्हो, सीताकुण्ड,गौरीका पाइला,किराँतीछाप ,धर्मघरजस्ता धार्मिक स्थानहरुको नामाकरण रहेको छ ।