गौरीशंङ्कर बहुमुखी क्याम्पस दोलखाले स्थापना दिवसको अवसर पारेर निशुल्क स्वास्थ्य शिविरको आयोजना गरेको छ । क्याम्पसले ४२ औ स्थापना दिवस एवम वार्षिक उत्सव तथा दोस्रो क्याम्पस सभाको अवसर पारेर निशुल्क शिविर गरेको हो ।
धुलिखेल अस्पताल दोलखाको प्राविधिक सहयोगमा क्याम्पस परिसरमा सम्पन्न शिविरमा जम्मा १ सय ५७ जनाले निशुल्क सेवा प्राप्त गरेको धुलिखेल अस्पतालका जनस्वास्थ्य अधिकृत रमेश श्रेष्ठले बताउनु भयो ।

जन स्वास्थ्य अधिकृत श्रेष्ठका अनुसार हाडजोर्नी र सामान्य ८२ जना र दन्तरोग सम्बन्धी ७५ जनाले सेवा लिएका छन् । जसमध्ये हाडजोर्नी सम्बन्धी ४ जनालाई थप उपचारका लागि रिफर गरिएको छ भने दाँत सम्बन्धी समस्या ७५ मध्य ६२ जनालाई थप उपचारका लागि रिफर गरिएको छ ।

डाक्टर अनिल श्रेष्ठको नेतृत्वमा डाक्टर नमन कोजुले हाडजोर्नी र डाक्टर सुजन तिमल्सिना र डाक्टर स्नेहा सापकोटाले दन्त सम्बन्धी उपचार गर्नु भएको थियो ।
उपचारसंगै अस्पताल र भीमेश्वर नगरपालिकाको सहयोगमा निशुल्क औषधी समेत वितरण गरिएको छ ।
शिविरमा हाडजोर्नी,दन्त सम्बन्धी र सामान्य सेवा प्रदान गरिएको थियो ।

क्याम्पसले वार्षिक उत्सवको सन्दर्भ पारेर रक्तदान कार्यक्रमसहित विभिन्न अतिरिक्त क्रियाकलापको आयोजना गर्दै आएको छ । भोलि चैत्र १५ गते क्याम्पसले विभिन्न कार्यक्रमका साथ स्थापना दिवस मनाउने तयारी गरिरहेको क्याम्पसले जनाएको छ ।