साना किसान कृषि सहकारीको अध्यक्षमा होम पाठक निर्विरोध

2 वर्ष अगाडि | समदृष्टि अनलाइन संवाददाता

हाम्रो साना किसान कृषि सहकारी संस्था कालिञ्चोक दोलखाको अध्यक्षमा होम प्रसाद पाठक निर्विरोध निर्वाचित हुनुभएको छ ।

कृषि सहकारी संस्था कालिञ्चोक दोलखाको प्रथम साधारण सभाले होम प्रसाद पाठकको अध्यक्षतामा १३ सदस्यीय सञ्चालक समिति चयन गरेको हो ।

सञ्चालक समितिको उपाध्यक्षमा बद्रीनाथ शिवाकोटी,सचिव गुरु प्रसाद खरेल,कोषाध्यक्षमा तुलसा बसेल रहनु भएको छ भने सदस्यहरुमा लक्ष्मी सेढाँई शिवाकोटी,उर्मिला भारती,सुन्दर श्रेष्ठ,रामकाजी शिवाकोटी,सावित्रा आचार्य,शान्ता आचार्य खत्री,राम बहादुर बस्नेत,गोकर्ण शिवाकोटी र कालि प्रसाद शिवाकोटी चयन हुनु भएको छ ।

कार्यक्रममा प्रमुख अतिथि रहनु भएका कालिञ्चोक गाउँपालिका अध्यक्ष अर्जुन प्रसाद शिवाकोटीले कृषि नमुना पालिकाको रुपमा विकास गर्ने गरी गाउँपालिकाले योजना बनाइसकेकोे धारणा राख्नुभयो । उहाँले गाउँपालिकामा उत्पादन भएका कृषिजन्य सामग्रीको लागि बजार व्यवस्थापनको जिम्मा लिनेसमेत प्रतिवद्धता व्यक्त गर्नुभयो ।

कार्यक्रमलाई सम्बोधन गर्दै गाउँघर साना कृषि सहकारी संस्था मेलुङका अध्यक्ष श्रीराज पोखेलले कृषि,किसान र उत्पादनसंग जोड्न कृषि सहकारी प्रभावकारी हुने धारणा राख्नुभयो । किसानको सफलतामार्फत गाउँपालिकाको पहिचान बनाउन गाउँपालिकालाई आग्रह गर्नुभयो ।

कार्यक्रममा संस्थाका अध्यक्ष होम पाठकले कृषि उद्यमको विकास विना ग्रामीण विकास सम्भव नहुने भएकाले व्यवस्थित श्रमको वातावरण बनाउन कृषि सहकारीको स्थापना गरेको बताउनुभयो । अध्यक्ष पाठकले कृषि उत्पादनमा लाग्न कृषकलाई आग्रह गर्दै बजार व्यबस्थापनको जिम्मा सहकारीले लिने विश्वास व्यक्त गर्नुभयो ।

कार्यक्रममा संस्थाको प्रगति प्रतिवेदन संस्थाका सचिव गुरु प्रसाद खरेल र आर्थिक प्रतिवेदन कोषाध्यक्ष तुलसा बसेलले प्रस्तुत गर्नुभएको थियो । संस्थामा हाल ३ सय जना सदस्य रहेका छ । सहकारीको कार्यक्षेत्र हाल कालिञ्चोक गाउँपालिका वडा नं ७,८ र ९ रहेको छ । विगत ३ महिना अगाडि तदर्थसमिति गठन गरी कार्य सञ्चालन गरेको सहकारीले आज प्रथम साधारण सभा सम्पन्न गरेको हो । कालिञ्चोक गाउँपालिका वडा नं ८ मा मुख्य कार्यालय सञ्चालन गरेर संस्थाले सेवा प्रवाह गर्दै आएको छ ।