भीमेश्वर नगरपालिका वडा नं ५ ले नयाँ सन्देशसहित भर्ना अभियान सञ्चालन गर्ने योजना बनाएको छ । वडा नं ५ को आयोजनामा महेन्द्रोदय माध्यमिक विद्यालय माटीमा आयोजना गरेको एक दीवसीय शैक्षिक गुणस्तर अभिबृद्धि कार्यशाला गोष्ठीको आयोजना गरेर भर्ना अभियान सन्देशमूलक बनाउने निर्णय गरेको हो ।

वडा भित्रका विद्यालयमा सिकाइ उपलब्धी बृद्धिका लागि सरोकारवाला पक्षसंग गोष्ठीको आयोजना गरिएको वडाध्यक्ष बासु श्रेष्ठले बताउनु भयो ।
सामुदायिक विद्यालयमा विद्यार्थी सङ्ख्या वृद्धिका लागि नयाँ सन्देशसहित शैक्षिक सत्रको भर्ना अभियान सञ्चालन गर्ने गोष्ठीको निष्कर्ष रहेको छ । कार्यक्रममा वडाको शैक्षिक योजना निर्माण गरेर नमुना वडा बनाउने,शिक्षामा सुधार हुने गरी लगानी गर्ने र शिक्षक,अभिभावक र विद्यार्थी प्रोत्साहनका आकर्षक कार्यक्रमसहित शैक्षिक सुधारमा जोड दिने वडाले योजना बनाएको छ ।
कुटीडाँडा माध्यमिक विद्यालय मकैबारीका प्रधानाध्यापक एवं कार्यक्रमका प्रमुख अतिथि शङ्करलाल श्रेष्ठले शिक्षकले कक्षा कोठामा विद्यार्थीको सक्षमता केन्द्रित हुनु पर्ने कुरामा जोड दिनुभयो । विद्यार्थीलाई सिकेका कुरा व्यवहार सुधारमा प्रयोग गर्न सक्ने बनाएर अभिभावकको मन जित्न सके सामुदायिक विद्यालयप्रतिको धारणा सकारात्मक हुने अनुभव सुनाउनु भयो ।

कार्यक्रममा कुटीडाँडा माध्यमिक विद्यालयले गर्दै आएका असल अभ्यासका विषयमा जानकारी दिँदै शैक्षिक सुधारका सम्भावनाका विषयमा सहभागीलाई जानकारी दिनुभयो ।
कार्यक्रममा बुढाभीमसेन माध्यमिक विद्यालय धरमघरका प्रधानाध्यापक राजन कार्की,महेन्द्रदोय माध्यमिक विद्यालय माटीका प्रधानाध्यापक लक्ष्मी भुजेल,विसुन्टोल आधारभूत विद्यालयका प्रधानाध्यापक परशुराम थापा,माथिल्लो माटी प्राथमिक विद्यालयका प्रधानाध्यापक सावित्री पाण्डे लगायतले विद्यालयका असल अभ्यास,चुनौति र सम्भावनाका विषयमा जानकारी गराउनु भएको थियो ।
गोष्ठीमा शिक्षक महासंघ भीमेश्वर नगर समितिका अध्यक्ष बालकृष्ण दहाल र महेन्द्रोदय माध्यमिक विद्यालय व्यवस्थापन समिति अध्यक्ष रामकृष्ण थापा लगायतले शैक्षिक सुधारका लागि वडा शिक्षा समितिलाई सुझाव दिनुभयो ।

कार्यशाला गोष्ठीमा भीमेश्वर नगरपालिका वडा नं ५ का सबै सामुदायिक विद्यालय व्यवस्थापन समिति,शिक्षक अभिभावक संघ,विद्यालयका प्रधानाध्यापक एवम शिक्षक,जनप्रतिनिधि लगायतको उपस्थिति रहेको थियो ।
वडा नं ५ मा २ माध्यमिक विद्यालय,१ आधारभूत विद्यालय र १ प्राथमिक विद्यालय रहेका छन् ।