जेठ ६

दोलखाको शैलुङ गाउँपालिका वडा नम्बर ७ फस्कुस्थित चर्नावती धाममा जेष्ठ नागरिक सेवा केन्द्र सञ्चालानका लागि आयोजना गरिएको श्रीमद् देवीभागवत महापुराण नवाह ज्ञान महायज्ञको पहिलो दिन नै ६ लाख ८२ हजार ७ सय १५ रुपैयाँ रकम नगद आर्थिक संकलन भएको छ । महायज्ञको पहिलो दिनमा सबै भन्दा बढी दोलखाको शैलुङ गाउँपालिका वडा नम्वर ८ का समाजसेवी सोवित उप्रेतीले ३ लाख रुपैयाँ प्रदान गर्नु भएको चर्नावती त्रिवेणी विकास तथा प्रवर्द्धन संघ दोलखाका अध्यक्ष गुण बहादुर बुढाथोकीले जानकारी दिनुभयो ।
त्यसैगरी महायज्ञकको पहिलो दिनमानै शैलुङ गाउँपालिका वडा नम्वर ७ मा रहेको भद्रेश्वर कृषि सहकारी संस्थाले १ लाख १ हजार १ सय रुपैयाँ रकम सहयोग गरेको छ भने राप्रपाका केन्द्रिय सदस्य प्रविण कुमार थोकरले १ लाख १ हजार रकम प्रदान गर्नुभएको छ । महायज्ञको पहिलो दिन आज ६ लाख ८२ हजार ७ सय १५ रुपैयाँ रकम संकलन भएको हो ।
यता शैलुङ गाउँपालिकाले १५ लाख रुपैयाँ रकम दिने घोषणा गरेको छ । पालिका अध्यक्ष रिमाल बाबु श्रेष्ठले महायज्ञको उद्घाटन कार्यक्रमको अवसरमा १५ लाख रुपैयाँ रकम अक्षयकोषमा राख्ने घोषण गर्नुभएको हो । त्यसैगरी मेलुङ गाउँपालिकाले जेष्ठ नागरिक सेवा केन्द्र सञ्चालनका लागि अक्षयकोषमा १० लाख रुपैयाँ प्रदान गर्ने घोषण गरेको छ । जेष्ठ नागरिक सेवा केन्द्र सञ्चालनका लागि आगामी आर्थिक वर्ष २०८०÷०८१को बजेटमा १० लाख रुपैयाँ रकम अक्षयकोषमा राख्ने  गाउँपालिकाका अध्यक्ष हिराकुमार तमाङले घोषणा गर्नुभएको छ ।