गौरीशङ्कर बहुमुखी क्याम्पस चरिकोट दोलखामा ३ दिने प्राज्ञिक लेखन क्षमता विकास तालिम कार्यक्रमको आयोजना गरिएको छ ।
क्याम्पस सञ्चालक समितिका अध्यक्ष अमृत राउतको प्रमुख आतिथ्यतामा सम्पन्न तालिम उद्घाटन कार्यक्रमलाई सम्बोधन गर्दै अध्यक्ष राउतले  शैक्षिक गुणस्तर अभिवृद्धिमा अनुसन्धानको महत्वपूर्ण भूमिका रहने भन्दै तालिमलाई व्यवहारमा देखाउन सुझाव दिनुभयो । कार्यक्रममा बोल्ने क्रममा उहाँले क्याम्पसमा शैक्षिक गुणस्तरमा अब्बल बनाउन आफू प्रयत्नशील भएको धारणा राख्नुभयो । साथै अबको ३ वर्षमा क्याम्पसमा १ करोड बराबरको छात्रवृत्तिको व्यवस्थापन गर्ने र सुविधासम्पन्न छात्रवासको व्यवस्था गर्ने योजना रहेको पनि अध्यक्ष राउतले बताउनु भयो ।

कार्यक्रममा शुभकामना मन्तव्य व्यक्त गर्दै क्याम्पस सञ्चालक समितिका सदस्य रमेश खतिवडाले क्याम्पसलाई अनुसन्धानमा अब्बल क्याम्पस बनाउन सुझाव दिनुभयो । उहाँले हिमाली जिल्लाकै सर्वश्रेष्ठ र गौरव गर्न लायक क्याम्पस बनाउन लाग्ने प्रतिवद्धता व्यक्त गर्नुभयो ।
गौरीशंकर बहुमुखी क्याम्पस चरिकोटका क्याम्पस प्रमुख शान्त केसीको अध्यक्षतामा भएको कार्यक्रममा क्याम्पस प्रमुख केसीले क्याम्पसले नियमित प्रकाशन गर्ने रिसर्च जर्नलका लागि प्राज्ञिक लेखनको सक्षमता अभिवृद्धि गर्ने उद्देश्यले तालिम कार्यक्रमको आयोजना गरिएको बताउनुभयो ।
प्राज्ञिक लेखन तालिमको उद्देश्यबारे प्रकाश पार्दै अनुसन्धान व्यवस्थापन इकाइ प्रमुख नारायण प्रसाद सेढाईँले क्याम्पसको सामाजिक दायित्व अन्तरगत अनुसन्धान कार्य गर्न तालिम कार्यक्रम प्रभावकारी हुने धारणा राख्नु भयो ।
कार्यक्रमको सहजीकरण त्रिभुवन विश्वविद्यालका डा.महेन्द्र सापकोटा र नेपाल खुल्ला विश्व विद्यालयका डा. कर्ण रानाले गर्नुभएको छ ।
तालिम कार्यक्रममा दोलखा,रामेछाप र सिन्धुपाल्चोकका विभिन्न क्याम्पसका ३० जना प्राध्यापकहरुको सहभागिता रहेको छ ।
तालिम कार्यक्रम विश्व विद्यालय अनुदान आयोगको सहयोगमा सञ्चालन गरिएको हो ।