दोलखा विगु ८ का एक बालकको आर्थिक अभावका कारण उपचार गर्न समस्या भएको छ । विगु गाउँपालिका थामीचागुका कुमार थामी र देशी थामीका  ७ वर्षका छोरा सुनिल भनिने निर्माण थामीको आर्थिक अभावका कारण उपचारमा समस्या भएको हो ।
विगत १५ दिनदेखि टाउकोमा समस्या देखापरेपछि काभ्रेको धुलिखेल अस्पतालमा उपचार गर्न पुगेका बालकलाई जटिल समस्या देखिएपछि हाल भेन्टिलेटरमा राखेर उपचार गराइरहेको पारीवारिक स्रोतले जनाएको छ ।
हाल बालकको उपचारमा खर्च धेरै लाग्ने भएपछि आमा देशी थामीले बालकको जीवन रक्षाका लागि आर्थिक सहयोग गर्न सबैलाई अनुरोध गर्नुभएको छ । दैनिक भेन्टिलेटरमा राखेर उपचार गर्नुपर्ने भएकोले सकेको सहयोग गरेर छोराको जीवन बचाइदिन सबैसंग आव्हान गर्नुभएको हो ।
आमा र छोरा विगत ३ वर्षदेखि महिला तथा बालबालिका संरक्षण केन्द्र (स्नेह केन्द्र) दोलखामा आश्रित रहेका छन् । बालक भने केही समय अगाडि मात्रै बाबुसंग गएका थिए । बाबुसंगै रहेका बालक थामीलाई जटिल प्रकृतिको रोग लागेपछि बाबुको पनि आर्थिक अबस्था कमजोर भएकोले उपचारमा समस्या भएको हो । बाबु कुमार थामी वैदेशिक रोजगारमा रहेको बेला आमा देशीमाया जोखिममा परेपछि आमा छोरा नै स्नेह केन्द्रको संरक्षणमा रहेका थिए । छोरोको अस्पतालमा उपचार भइरहेको केही दिन अगाडि मात्रै थााहा पाएकी आमा देशीले संरक्षण केन्द्रबाटै छोरो बचाइदिन आग्रह गर्नुभएको छ ।
३ वर्षसम्म संरक्षण केन्द्र बसेका बालकको जटिल रोगको उपचार गर्न समस्या भएको संरक्षण केन्द्र सञ्चालक तथा आवाज नेपालकी अध्यक्ष सिर्जना कार्कीले बताउनुभयो । कार्कीले बालकको जीवन रक्षाका लागि सबैलाई सहयोग गर्न अपिल गर्नुभएको छ ।
नेपाल इन्भेष्टमेन्ट मेघा बैंक लिमिटेड खाता नं   15305150250252 \ १५३०५१५०२५०२५२ मा सहयोग रकम जम्मा गर्न सकिने छ । आवश्यक जानकारीको लागि ९८४७३११३०४ मा सम्पर्क गरेर पनि सहयोग गर्न सकिने पारीवारिक स्रोतले जनाएको छ ।