दोलखाको मेलुङ गाउँपालिकामा आर्थिक वर्ष २०७९÷८० को कार्यक्रम तथा सेवा प्रवाहका सन्दर्भमा सार्वजनिक सुनुवाइ कार्यक्रम सम्पन्न भएको छ ।
मेलुङ गाउँपालिका अध्यक्ष हिरा कुमार थोकरको अध्यक्षतामा भएको कार्यक्रममा आ.व.०७९÷०८० को आय व्ययको विवरण पालिका प्रमुख प्रशासकीय अधिकृत सञ्जय शिवाकोटीले प्रस्तुत गर्नु भएको थियो । आर्थिक वर्ष ०७९०८० को आय जम्मा ६० करोड ८७ लाख ९५ हजार र कुल व्यय ४७ करोड ७ लाख २७ हजार ५८१ रुपैयाँ अर्थात ७७.३२ प्रतिशत खर्च प्रगति भएको थियो । शिक्षा, युवा तथा खेलकुद, उर्जा कानुन तथा न्याय र श्रम तथा रोजगारतर्फ विनियोजित रकमको ९० प्रतिसत भन्दा बढी रकम खर्च भएको छ भने सबै भन्दा कम खर्च शासन प्रणाली विकासमा ३३.३३ प्रतिशत मात्र खर्च भएको अधिकृत शिवाकोटीले सार्वजनिक गर्नुभएको थियो ।

सार्वजनिक सुनुवाई कार्यक्रममा गाउँपालिका उपाध्यक्ष गायत्री आचार्य, प्रमुख प्रशासकीय अधिकृत सञ्जय शिवाकोटी, वडा अध्यक्षहरु, कार्यपालिका सदस्य, वडा सदस्य, तथा पालिकाका विभिन्न शाखा प्रमुख तथा कर्मचारीहरु जवाफदेहिता वक्ताको रुपमा रहनु भएको थियो ।
पूँजीगत तर्फ विकास निर्माणको सबैभन्दा बढी रकम भौतिक पूर्वधार विकासमा १९ करोड १७ लाख ७६ हजार विनियोजित भएकोमा ७४.१५% अर्थात १४ करोड २१ लाख ९७ हजार ७१८ रुपैयाँ खर्च भएको छ ।
सार्वजनिक सुनुवाइमा सहभागीबाट उठेको प्रश्नको जवाफ दिदै पालिका अध्यक्ष हिरा थोकरले मेलुङ गाउँपालिकालाई स्थानीय सरकार सञ्चालन ऐन, प्रचलित कानुन, नीति र विधि अनुसार सञ्चालन गरि सबैलाई सुशासनको प्रत्याभूति हुनेगरी जवाफदेहिपूर्ण तरिकाले गाउँपालिका सञ्चालन गरिने प्रतिवद्धतासमेत व्यक्त गर्नु भएको मेलुङ गाउँपालिका प्रवक्ता नवराज खड्काले जानकारी दिनुभयो । कार्यक्रममा मेलुङ गाउँपालिकाका बुद्धिजीवी,शिक्षक,कृषक लगायत मेलुङबासीहरुको उपस्थिति रहेको थियो ।