निलकमल कृषि सहकारीको कफी अन्तराष्ट्रिय बजारमा खपत हुन लागेको छ । कफी बजार व्यवस्थापनको लागि द फेस्को हिमालयन कम्पनी काठमाण्डौसंग व्यापार सम्झौता गरेर सहकारीको नाम र लोगोसहितको कफी इटली र फान्स लगायतका देशमा निर्यात शुरु भएको सहकारीका संस्थापक अध्यक्ष टहल आचार्यले बताउनुभयो ।
निलकमल कृषि सहकारी संस्थाले यो वर्ष मात्र १ लाख ४३ हजारको कफी विक्री गरेको छ । दोलखाको कालिञ्चोक ८ सुनखानीमा रहेको कृषि सहकारीले परम्परागत रुपमा कफी खेती गर्दै आएका कृषकबाट संकलन गरेर कफी विक्री गरेको हो ।

कफीको उत्पादन र बजारको सम्भावनालाई अध्ययन गरेर सहकारीले यसबर्ष ५१ जना कृषकलाई तालिम प्रदान गरी ६ हजार कफीका विरुवासमेत वितरण गरेको छ ।
द लेप्रोसी मिसन फाउण्ड प्रोजेक्ट र द फ्रेस्को हिमालयन कम्पनी काठमाण्डौंको सहयोगमा ६ हजार कफीका विरुवा रोप्ने काम सम्पन्न भएको हो । कृषकको मागलाई ध्यानमा राखेर यो वर्षबाट सहकारी आफैले कफीको नर्सरी गर्ने समेत योजना बनाएको संस्थापक अध्यक्ष आचार्यको भनाइ छ ।
कफी बाँदरले पनि विगार नगर्ने, खेती प्रविधि सहज र बजार व्यवस्थापनकै कारण कृषकहरु अहिले कफी खेती तर्फ आकर्षित भएको सहकारीका अध्यक्ष कल्पना खरेलले बताउनुभयो ।

विगतका वर्षहरुमा सहकारीले १५ रोपनी क्षेत्रफलमा अदुवा खेती गरेको थियो । अदुवा राम्रो उत्पादन भएपनि बजार व्यवस्थापनको अभावले अदुवा खेती प्रभावकारी नभएपछि पछिल्लो समय विकल्पको रुपमा कफी खेती छनौट गर्नुपरेको अध्यक्ष खरेलको भनाइ छ ।
वि.सं २०६७ सालमा कुष्ठ प्रभावित र अपाङ्गता भएका व्यक्तिको उत्थानका लागि ऋङ्गेश्वर स्वय सहायत समूह गठन भएको थियो । लेप्रोसी मिसन नेपालको सहयोगमा गठन भएको उक्त संस्था वि.स. २०७० सालमा निलकमल कृषि सहकारी संस्थाको रुपमा रुपान्तरित भएर कृषकलाई व्यवसायिक बनाउने अभियान रहेको छ । हाल कालिञ्चोक गाउँपालिका वडा नं ७,८ र ९ कार्यक्षेत्र बनाएर सेवा विस्तार गर्दै आएको छ । सहकारीमा हाल बालसदस्य सहित १ हजार ९ सय सदस्य रहेका छन् ।