गाईवस्तुमा लाग्ने रोग ‘लम्पी स्किनका कारण दोलखामा ४२ वटा पशु मरेका छन् । जिल्लाको मेलुङ र शैलुङ गाउँपालिका बाहेक अन्य ७ वटा स्थानीय तहका ४२ वटा पशुहरु मरेका हुन् । गत चैत महिनादेखि असारको दोस्रो सातासम्मको तथ्याङ्क अनुसार महामारीको रुपमा फैलिएको रोगका कारण दोलखाका मात्रै ४२ पशु मरेका छन् ।
भेटेरीेनरी अस्पताल तथा पशुसेवा विज्ञ केन्द्र दोलखाका निमित्त प्रमुख पलट चौधरीका अनुसार भीमेश्वर नगरपालिकामा ५ सय ५६ पशुमा संक्रमण भएकोमा १४ पशु मरेका छन् । जिरी नगरपालिकामा १ सय १५ संक्रमण भएकोमा ४ तामाकोशीमा १ सय ९६ मा संक्रमण फैलिएकोमा ७ पशुको मृत्यु भएको छ । बैत्यश्वरमा १ हजार ५ सय १२ पशु संक्रमण भएकोमा ७ पशु मरेका छन् ।
कालिञ्चोक गाउँपालिकाका १ सय ५४ पशुमा संक्रमण भएकोमा ४ मरेका छन् भने विगुमा १ सय ५० मा संक्रमण फैलिएकोमा ५ पशु मरेका छन् । गौरीशंकरमा ९८ पशुमा संक्रमण भएकोमा १ पशु मरेका हुन् । जिल्लाको शैलुङ गाउँपालिकामा १ सय ५० र मेलुुुुुुुुुङ गाउँपालिकाका ५० पशुमा संक्रमण फैलिएको तर मृत्यु भने नभएको कार्यालयले जनाएको छ ।
जिल्लाका ९० प्रतिशत गाईहरुमा संक्रमण फैलिएको छ भने १० प्रतिशत मात्रै भैंसीमा फैलिएको पाइएको छ ।
जिल्लामा हाल २ हजार ८ सय ९० वटा पशुहरु संक्रमित भएका छन् । रोग नियन्त्रणका लागि भेटेरिनरी अस्पताल तथा पशुसेवा विज्ञ केन्द्र दोलखाले सबै पालिकाहरुमा खोप वितरण गरेको छ भने जिल्लाका सबै स्थानीय सरकारले पनि महामारी नियन्त्रणका लागि खोप कार्यक्रम सञ्चालन गरिरहेको छ ।
यो रोग लागेका पशुमा उच्च ज्वरो आउने,दूध उत्पादन घट्ने, छालामा गिर्खा देखिने, ¥याल सिँगान बग्नेजस्ता लक्षण देखा पर्दछन् । घरपालुवा पशुको ज्यानै लिने जटिल प्रकृतिको सरुवा रोग ‘लम्पी स्किन’ले महामारीको रुप लिएको छ ।