लुम्पी स्किन रोगले महामारीको रुप लिन थालेपछि मेलुङ गाउँपालिका दोलखाले कृषक गोठ अभियान सञ्चालन गरेको छ । गाउँपालिका अध्यक्ष हिरा कुमार थोकर र उपाध्यक्ष गायत्री आर्चायको नेतृत्वमा भेटेरीनरी डाक्टर विज्ञसहितको टोलीसहित गाउँपालिकाका विभिन्न वडामा गोठ अभियान सञ्चालनमा ल्याएको हो ।
सयौँको सङ्ख्ख्यामा गाईवस्तु मर्न थालेपछि गाउँपालिकाले सोमबारदेखि लुम्पी स्किन रोग विरुद्ध कृषक गोठ अभियान सुरु गरिएको हो ।
गाउँपालिका अध्यक्ष हिरा थोकरको नेतृत्वमा मेलुङ गाउँपालिका वडा नं.१ पवटीबाट र उपाध्यक्ष गायत्री आचार्यको नेतृत्वमा मेलुङ गाउँपालिका वडा नं. ७ बाट अभियान शुरु गरिएको प्रवक्ता नवराज खड्काले बताउनुभयो । टिममा पशु विज्ञ सेवा केन्द्रका डाक्टर  ध्रुब डिसी, हेफर नेपालका शान्त भट्टराई,पशुसेवाकेन्द्र मेलुङका राष्ट्र श्रेष्ठसहितको टोली अभियानमा रहेको छ ।
अभियानमा रहनुभएका प्रवक्ता खड्काका अनुसार असारको समयमा गोरु विरामी भएकै कारण  किसानलाई रोपाई गर्न समेत समस्या भएको छ । किसानहरु खनेरै रोपाइँ गर्न बाध्य भएका छन् ।
मेलुङ गाउँपालिकामा हालसम्म ३ सय पशुमा यो रोग प्रमाणित भएको छ भने ५ भन्न्दा बढी पशुको मृत्यु भएको छ । यो रोग केहि दिन देखि मेलुङमा तीब्र गतिमा फैलिएको छ । हाल सम्म यो रोग विरुद्ध ९ सय पशुलाई खोप लगाईएको छ । खोपलाई तीब्र बनाउने गाउँपालिकाको योजना रहेको गाउँपालिका प्रवक्ता नवराज खड्काले बताउनुभयो ।

रोग लागेको ५ सय मिटर वरपर खोप लगाउँदा यसको नकारात्मक असर पर्ने भएकोले खोप लगाईसकेको क्षेत्रमामा सवाधानी नै महत्त्वपूर्ण रोगथाम भएको विज्ञको सुझाव रहेको छ ।

लम्पी स्कीन रोग लागेमा १०४ देखि १०७ डिग्री सम्म ज्वरो आउने, शरीरभरि डाबर आउने, खुट्टा ह्याकुलो सुनिने, शरीरको भित्री भागहरुमा समेत डाबर गिर्खा आउने र गोबरमा रगत देखा पर्ने लक्षणहरु देखिने विज्ञको भनाई छ । रोग लागेपछि दूध दिने पशुको ८० प्रतिशत दूध घट्ने र पशुको मृत्यु समेत हुने गरेको छ ।
लम्पी स्कीन भाईरसबाट सर्ने रोग भएकाले पशु गोठ वरपर सरसफाइ राख्नुपर्ने, पोषणयुक्त खानेकुरा प्रशस्त खुवाउने, झिंगा, लामखुट्टे, किर्नाले टोक्न नदिने, पशु खरिद बिक्री नगर्ने र संक्रमित पशुलाई छुट्टै राखी उपचार गनु पर्ने बताएका छन् ।