भीमेश्वर नगरपालिका वडा नं ५ ले जेष्ठ नागरिकको घरघर पुगेर स्वास्थ्य परीक्षण सेवा सुरु गरेको छ ।  दोलखाको भीमेश्वर नगरपालिका वडा नं ५ तल्लो माटीका १०२ वर्षका टेक बहादुरको स्वास्थ्य परीक्षणबाट सेवा शुरु गरेको हो ।
सामान्य उपचारका लागि स्वास्थ्य संस्था जान कठिन भएका वृद्धवृद्धालाई घरमै उपचारको व्यवस्था भएपछि जेष्ठजन निक्कै खुसी छन् – स्थानीय सूर्य थापाले भन्नुभयो । सामान्य रोग पनि पहिचान गर्न नसक्दा जेष्ठ नागरिकले निक्कै पीडा भोग्नु परेको थियो । घरघरमै पुगेर सेवा दिने कुराले जेष्ठ नागरिक हर्षित छन् उहाँले भन्नुभयो ।

मासिक रुपमा वडाका ७० वर्षमाथिका जेष्ठ नागरिकहरुको स्वास्थ्य परीक्षण गरी औषधीसमेत वितरणको कार्यक्रम रहेको वडाध्यक्ष बासु श्रेष्ठले बताउनु भयो । वडाध्यक्ष श्रेष्ठका अनुसार वडा अन्तरगतका स्वास्थ्य चौकीका स्वास्थ्यकर्मी र स्वास्थ्य स्वयमंसेवीकाहरु प्रत्येक महिना जेष्ठ नागरिकका घरमा पुगेर सेवा प्रदान गर्ने छन् । जटिल रोग भएमा उपयुक्र्त स्वास्थ्य संस्थामा रिफर गर्ने छन् भने सामान्य रोगका लागि औषधी वितरण गर्ने छन् ।
आज वडाको तल्लो माटी र भट्यौलीका १५ जना जेष्ठ नागरिकको ब्लड प्रेसर,ज्वरो,शरीरमा अक्सिजनको मात्रा लगायतको स्वास्थ्य परीक्षण गरी आवश्यक औषधी प्रदान गरेको वडाले जनाएको छ । वडा नं ५ मा ७० वर्षमाथिका ३ सय जेष्ठ नागरिक रहेका छन् ।