दोलखा,
साउन ७

दोलखाको गौरीशङ्कर बहुमुखी क्याम्पस चरिकोटले  विद्यार्थीहरूका लागि डिजिटल हाजिरी सुरू गर्ने भएको छ । विद्यार्थीको उपस्थितिलाई थप व्यवस्थित गर्न जिल्लामै पहिलो पटक डिजिटल हाजिरी सुरू गर्न लागेको हो ।

विद्यार्थीहरूको नियमितताको अद्यावधिक गर्ने,जुनसुकै समयमा क्याम्पस प्रशासनले निगरानी गर्न पाउने र अभिभावलाई छोराछोरीको उपस्थितिका विषयमा जानकारी गराउन सहज हुने लगायतका उद्देश्यहरू राखेर क्याम्पसमा डिजिटल हाजिरी सुरू गर्न लागिएको क्याम्पस प्रमुख शान्त केसीले बताउनुभयो ।

क्याम्पसमा प्रत्येक सातदिनमा विद्यार्थीको हाजिरी हेर्छौ र विद्यार्थी अनुपस्थित भएमा अभिभावकलाई खबर गर्छौ । यो कार्यक्रमले शैक्षिक गुणस्तरलाई समेत सहयोग पुग्नेछ,–उहाँले भन्नुभयो ।

क्याम्पसले प्रदान गरेको परिचयपत्र मार्फत हाजिर गर्ने व्यवस्था गरेका छौ. । अनलाइन इ–हाजिरी सुरू गराएपछि विद्यार्थीहरूको नियमितता हुने, नयाँ प्रविधि भएकोले विद्यार्थी र अभिभावकसमेत उत्साहित भएका छन् –क्याम्पस प्रमुख केसीको भनाइ छ ।

यो वर्षदेखि विद्यार्थीका लागि क्याम्पस पोशाक अनिवार्य गर्ने र विद्यार्थीको अनुशासन कायम गर्न अनुशासन  प्रमुखकोसमेत व्यवस्थापन गर्ने तयारी भएको क्याम्पसका सहायक क्याम्पस प्रमुख सुवास रिमालले बताउनुभयो ।

क्याम्पसले शिक्षण सिकाइ सहजीकरणका लागि प्रविधिको प्रयोगलाई उच्च प्राथमिकतामा राखेको छ । विगतका वर्ष देखि नै विद्यार्थीको प्रविधिमैत्री सिकाइको लागि हरेक कक्षा कोठामा इन्टरनेटको पहुँच पुग्ने गरी व्यवस्थापन गर्दै आएको छ ।  कक्षा ११ का विद्यार्थीलाई लक्षित गरी आधारभूत कम्युटर कोर्ष निशुल्क प्रदान गर्ने कार्यक्रम रहेको क्याम्पसले जनाएको छ ।

क्याम्पसले विद्यार्थी भर्ना, शुल्क भुक्तानीसंगै विद्यार्थीका शैक्षिक प्रमाणपत्रहरु सपटवेयर प्रणाली मार्फत व्यवस्थापन गर्दै आएको छ । क्याम्पसले  विद्यार्थीलाई शुल्क तिर्न भौतिक रुपमा उपस्थित हुनु पर्ने वाध्यता नभएको क्याम्पसका लेखा प्रमुख राजकुमार सुवेदीको भनाइ छ । क्याम्पसका कुल विद्यार्थी मध्ये ४० प्रतिशत विदयार्थीले अनलाइन भुक्तानी गर्ने गरेको क्याम्पसको तथ्याङ्क रहेको छ ।

हिमाली जिल्लाकै सबैभन्दा ठूलो  र पुरानो गौरीशंकर बहुमुखी क्याम्पसमा कक्षा ११  र १२ मा शिक्षा,मानविकी,व्यवस्थापन र कानुनका विषयको पढाइ हुने गरेको छ भने स्नातक तहमा विएड,विविएस र विए एवं स्नातकोत्तर तहमा एमएड र एमविएस कार्यक्रम सञ्चालन भइरहेका छन् । हाल क्याम्पसमा १ हजार ५ सय विद्यार्थीहरु अध्ययरत छन् ।

क्यासम्पसले विश्व विद्यालय अनुदान आयोगले तोकेका सूचक पूरा गरी गुणस्तरयुक्त क्याम्पसका रुपमा आफूलाई स्थापित गर्दै छ भने अन्तराष्ट्रिय गुणस्तर चिन्ह प्राप्तितर्फ पनि क्याम्पस अग्रसर भइरहेको छ । ।