दोलखा सदरमुकाम चरिकोटमा रहेको प्रधानमन्त्री कृषि आधुनिकीकरण परियोजना कार्यालय सार्न लागेको भन्दै दोलखाका नागरिक अगुवाहरुले परियोजनाको कार्यालयमा ताला लगाएका छन् ।

जिल्लाबाट विभिन्न विषयगत कार्यालय अन्तै सार्ने क्रम बढेको र अहिलेपनि प्रधानमन्त्री कृषि आधुनिकीकरण परियोजना चरिकोटबाट अन्य स्थानमा लाने तयारी भएपछि यसलाई रोक्न कार्यालयमा तालाबन्दी लगाउनु परेको नागरिक समाजका अगुवा चिरञ्जीवि मास्केले बताउनुभयो ।

तालबन्दी कार्यक्रममा जिल्लाका नागरिक अगुवा, पत्रकार, अधिकारकर्मी, व्यवसायी लगायतका जिल्लाबासीको सहभागिता रहेको थियो ।  प्रधानमन्त्री कृषि आधुनिकिकरण परियोजनाले दोलाखमा किवि र आलुको क्षेत्रमा काम गरिरहेको थियो ।

नागरिक अगुवाहरुले गत साउन ११ गते दोलाखका प्रमुख जिल्ला अधिकारी कोमल प्रसाद धमलालाई ज्ञापनपत्र मार्फत प्रधानमन्त्री कृषि आधुनिकिकरण परियोजना जिल्लाबाट हटाउन नहुने, संघियता अघि जिल्लामा रहेका कार्यालयहरु पुनः स्थापना गर्न पहल गर्नुपर्ने, चरिकोट– मूडे सडकको निर्माण नयाँ ठेक्का मार्फत तत्काल सुरु गर्नुपर्ने, चरिकोट बजारमा बसपार्क निर्माण तथा ट्राफिक व्यवस्थापनमा पहल गर्नुपर्ने लगायतका विषयमा ध्यानाकर्षण गराएको थियो ।