गौरीशंकर गाउँपालिका –७ टोपाटारका पहिरो पिडीतलाई नेपाली काँग्रेसले राहत वितरण गरेको छ । गएको साउन १८ गते गएको पहिरोबाट विस्तापित ३५ घर परिवारलाई राहतसहित नगद सहयोग गरेको नेपाली काँग्रेस महाधिवेशन प्रतिनिधि सन्तोष पाण्डेले बताउनुभयो ।
राहत वितरण कार्यक्रममा नेपाली काँङ्ग्रेसका केन्द्रिय सदस्य मधु आचार्य, नेपाली काँग्रेस महाधिवेशन प्रतिनिधि सन्तोष पाण्डे,नेपाली काँग्रेस दोलखाका नेता तारा कुमार खडका, कुमार अधिकारी,महेश काफ्ले,शैलेन्द्र खड्का,जयराम श्रेष्ठ,विमल आचार्य,नेपाली काँग्रेस गौरीशंकर गाउँपालिकाका पदाधिकारी लगायतको उपस्थितिमा खाद्यान्नसहितको नगद सहयोग गरेको हो ।
पहिरो पिडीतहरु लाई राहत वितरण कार्यक्रममा कार्यक्रमका प्रमुख अतिथि रहनु भएका नेपाली काँग्रेसका केन्द्रिय सदस्य मधु आचार्य लगायतको समुहले मृतकका परिवारलाई २० हजारका दरले रकम सहयोग गरेको छ । यस अगाडि पनि नेपाली काँग्रेसको पहलमा २ लाख १३ हजार नगद संकलन गरेर घाइतेको उपचारका लागि सहयोग हस्तान्तरण गरिसकेको नेपाली काँग्रेस दोलखाले जनाएको छ ।

पहिरोमा परी घाइते भएका  ५० वर्षिय यज्ञ बहादुर थामीको त्रिवि शिक्षण अस्पतालमा र उहाँकी श्रीमती अन्दाजी ३९ वर्षीय धनमाया थामी र उहँकी बुहारी करिब २२ वर्षिय सिता थामीको राष्ट्रिय ट्रमा सेन्टरमा उपचार भइरहेको छ ।
पहिरोमा परेर स्थानीय कृष्णबहादुर मगर, उहाँकी श्रीमती देवीमाया मगर, हरिलाल श्रेष्ठ बेपत्ता भएका थिए । बेपत्ता भएका मध्य १४ महिनाका बालक प्रिन्स थामीको र अन्दाजी ४० वर्षी देवी माया मगरको शव फेला परेको प्रहरिले जनाएको छ । पहिरोमा परि घाईतेहरुको सरकारले निशुल्क उपचार गर्ने भएको छ ।