दोलखाको सदरमुकाम चरिकोटमा आयोजना गरिएको “वन वातावरण तथा जलवायु परिवर्तन विषयक” कविता वाचन प्रतियोगितामा राईजिङ स्टार स्कुलकी विपासा खड्का प्रथम हुनुभएको छ ।
सामुदायिक वन दिवसको अवसरमा आयोजित कविता वाचन प्रतियोगिता पशुपति कन्या माविका छात्रा गंगा गौतम द्वितीय, कुटीडाँडा माविका छात्रा रिमना कार्की तृतीय र कालिञ्चोक माविकी छात्रा सिवानी श्रेष्ठ सान्त्वना हुन सफल हुुनु भएको छ ।
विद्यालय स्तरका बालबालिकामा वन र वातावरणका सन्दर्भमा जागरणका लागि सहयोग पुगोस् भन्ने उद्देश्यले सामुदायिक वन उपभोक्ता महासंघ,नेपाल जिल्ला महासंघ दोलखाका अध्यक्ष जगन्नाथ बस्नेतले बताउनुभयो ।
विजयी प्रतियोगीहरुलाई कार्यक्रमका प्रमुख अतिथि एवम भीमेश्वर नगर प्रमुख ईश्वर नारायण मानन्धरले पुरस्कार वितरण गर्नु भएको थियो । विजयी प्रतियोगीहरुलाई प्रथम पुरस्कार तीन हजार,द्वितीय पुरस्कार एक हजार पाँच सय र तृतीय पुरस्कार एक हजार रुपैया नगदसहित प्रमाणपत्र वितरण गर्नु भएको थियो ।
सामुदायिक वन उपभोक्ता महासंघका अध्यक्ष जगन्नाथ बस्नेतको अध्यक्षतामा कार्यक्रम सम्पन्न भएको हो ।
कवि एवम गीतकार केशवराज चौलागाईको संयोजकत्वमा कवि विष्णु सुवेदी,जानुका न्यौपाने,सहायक वन अधिकृत सुमन घिमिरेले कविता वाचन प्रतियोगिताको निर्णय गर्नु भएको थियो ।
सामुदायिक वन महासंघ दोलखाले हिजो च्याँसे भगवती सामुदायिक वनमा वृक्षारोपण गरेको थियो भने आज कविता प्रतियोगिता आयोजना गरेको हो ।
नेपालमा २०७३ सालमा ‘सामुदायिक वनको पहिचान, राष्ट्रिय समृद्धिको अभियान’ भन्ने नाराकासाथ पहिलो पटक सामुदायिक वन दिवस मनाइएको थियो ।