अखिल नेपाल राष्ट्रिय स्वतन्त्र विद्यार्थी युनियन दोलखाले सार्वजनिक महत्वका विषयमा जिल्ला प्रशासन कार्यालय दोलखामा ध्यानाकर्षण पत्र बुझाएको छ । विद्यार्थीलाई दिइने भाडा छुट लगायतका विषयमा जिल्ला प्रशासन कार्यालय दोलखामा ध्यानाकर्षण पत्र बुझाइएको अनेरास्ववियू दोलखाका अध्यक्ष रामचन्द्र केसीले बताउनुभयो ।ध्यानाकर्षण पत्र बुभदै दोलखाका प्रमुख जिल्ला अधिकारी कोमल प्रसाद धमलाले माग पुरा गर्ने प्रतिवद्धता व्यक्त गर्नुभएको छ ।

अनेरास्ववियु दोलखाले विद्यार्थी भाडा छुट कार्यान्वयन गरिनुपर्ने, यात्रुले सहजै देख्ने गरी भाडादर सार्वजनिक गर्नुपर्ने, यात्रुलाई अनिवार्य टिकट दिनुपर्ने, फोहोर व्यवस्थापनका लागि अनिवार्य सवारी साधनभित्र डस्बिनको व्यवस्था गर्नुपर्ने र नेपाल सरकारको मापदण्ड अनुसार भाडादर कायम गर्न माग गरिएको अनेरास्ववियु दोलखाका सहसचिव विष्णुराज गुरुङले जानकारी दिनुभयो ।दोलखा जिल्लामा सञ्चालनमा रहेका पूर्व अरानको याश्यात, रोल्वालिङ यातायात तथा विद्युतीय सवारी साधनले विद्यार्थीलाई दिँदै आएको ४५प्रतिशत छुट पूर्ण रुपमा कार्यान्वयन गरिनु पर्ने, चरिकोट सिगटी र चरिकोट जिरी सडकखण्डमा सञ्चालनमा रहेका सार्वजनिक सवारी साधनले लिंदै आएको भाडादर नियमअनुसार हुनु पर्ने भन्दै २०८० जेठ १४ मै ध्यानाकर्षण पत्र बुझाएपनि कार्यान्वयन नभएको भन्दै अनेरास्ववियु दोलखाले गम्भीर ध्यानाकर्षण भएको जनाएको छ ।अनेरास्ववियूले उठान गरेका सार्वजनिक महत्वका विषयमा सरोकारवाला निकायले ७ दिनभित्र माग पूरा नभए चरणवद्ध आन्दोलन गर्ने चेतावनी ध्यानाकर्षण पत्रमा उल्लेख गरिएको छ ।