मेलुङ गाउँपालिकाले बजार अनुगमन कार्यलाई तीव्रता दिएको छ । मेलुङ गाउँपालिका भित्र रहेका ६ वटा वडामा रहेका बजारको अनुगमन गरिएको हो । गाउँपालिका उपाध्यक्ष गायत्री आचार्यको नेतृत्वमा बजार अनुगमन सम्पन्न गरेको छ भने अनुगमनका क्रममा म्याद सकिएका खाद्यबस्तु अनुगमन समितिले फेला पारेको गाउँपालिकाले जनाएको छ ।
गाउँपालिका बासीको स्वस्थ खाद्य अधिकार सुनिश्चित गर्नु स्थानीय सरकारको दायित्व भएकाले बजार अनुगमनलाई प्राथमिकतामा राखेर कार्यक्रमको शुरुवात गरिएको उपाध्यक्ष आचार्यको भनाई छ ।
म्याद गुज्रिएका खाद्य पदार्थमा सबै भन्दा बढी भुजा, पीठो, बिस्कुट,पानी, कुरकुरे, बेसार,मसला, दालमोठ लगायतका सामग्रीको म्याद गएको भेटिएको छ । व्यवसाय दर्ता र नवीकरणको पनि त्यतिकै समस्या रहेको पालिकाले जनाएको छ ।
अनुगमनका क्रममा व्यवसाय दर्ता नवीकरण,पसलको सरसफाई,म्याद गुज्रिएका सामान नष्ट गर्ने,मूल्यसूची राख्ने लगायतका काम तत्काल गर्न गाउँपालिकाले सुझाव दिएको छ । गाउँपालिकाले दिएको सुझावलाई अटेर गरे कानुनी प्रक्रियामा जान वाध्य हुने उपाध्यक्ष आचार्यले चेतावनी समेत दिनुभएको छ ।
छुटेका र अनुगमन टोली पुग्दा बन्द रहेका व्यवसायमा पुनः अनुगमन गर्ने पालिकाको योजना छ । हाल सम्म पालिका ५० भन्दा बढी पसल अनुगमन गरिएको छ । अनुगमन गर्न वाँकी रहेको वडा नं ७ मा पनि तत्काल अनुगमनको कार्यक्रम सञ्चालन गर्ने पालिकाको भनाइ छ । अनुगमनमा गाउँपालिकाका प्रतिनिधि,जिल्ला प्रशासन कार्यालय,प्रहरी कार्यालय र घरेलु कार्यालयको प्रतिनिधित्व रहेको थियो ।