भीमेश्वर नगरपालिका दोलखाको वडा नं ७ ले विधुर पुरुष सहायता भत्ता वितरण गरेको छ ।
वडाभित्रका ४० वर्ष माथिका ३० जना विधुर पुरुषलाई वार्षिक ५ हजार भत्ता वितरण गरेको वडाअध्यक्ष विनोद तमाङले बताउनुभयो । आगामी वर्षका लागि मासिक ५ सयका दरले भत्ता वितरण गर्ने योजना रहेको उहाँको भनाइ छ ।
“अर्को वर्ष ४० वर्ष कटेका विवाह नगरी बसेका महिला जसले नेपाल सरकारको सुविधा प्राप्त गरेका छैनन् । उनीहरुलाई पनि एकल महिला सहायता भत्ता कार्यक्रममा समेट्ने योजना रहेको छ ।” वडाध्यक्ष तमाङले भन्नुभयो ।

आइतबार वडा कार्यालय परिसरमा आयोजना गरिएको रकम वितरण कार्यक्रममा वडाका २ सय ३५ जना जेष्ठ नागरिकलाई एक हजारका दरले भत्ता समेत वितरण गरिएको छ ।
चाडबाडको समयमा जेष्ठजनलाई खुसी बनाउन र आर्शीरवाद लिन सम्मान स्वरुप वडाको बजेटबाट भत्ता तथा सहयोग वितरण गरेको वडाको भनाई छ ।
कार्यक्रमका प्रमुख पूर्व वडाअध्यक्ष कैलास कुमार श्रेष्ठ,भीमेश्वर नगरपालिका वडा नं ६ का वडाध्यक्ष नवीन कुमार लामा,वडा नं ७ का वडाध्यक्ष विनोद लामाले शुभकामना व्यक्त गर्नुभएको थियो ।